مقاله

لندن – بریټانیا افغانستان ته د درېیو کلونو لپاره د بشري مرستو نوې بسته اعلان کړه

اشتراک گذاری:

بریانیوز - جمعه ٢۶ سرطان ١٤٠٥

د بریټانیا حکومت اعلان کړی چې په راتلونکو درېیو کلونو کې به د افغانستان د بشري اړتیاوو د پوره کولو لپاره هر کال ۱۰۵ میلیونه پونډه ځانګړي کړي

د منځني ختیځ، افغانستان او پاکستان لپاره د بریټانیا وزیر هیمش فولکنر ویلي، دغه مالي مرسته به د روغتیايي خدمتونو، زده‌کړو، د خلکو د معیشت د ښه کولو، راستنېدونکو کډوالو ته د لومړنیو خدمتونو د برابرولو او د اقلیمي بدلونونو پر وړاندې د مبارزې په برخو کې ولګول شي

نوموړي زیاته کړې چې لږ تر لږه نیمایي دغه مرستې به ښځو او نجونو ته ځانګړې شي، څو هغوی وکولای شي اساسي خدماتو ته ښه لاسرسی ولري

فولکنر ویلي، له نږدې پنځو کلونو وروسته هم افغانستان له ژور بشري کړکېچ سره مخ دی؛ شاوخوا ۲۲ میلیونه وګړي بشري مرستو ته اړتیا لري او اټکل کېږي چې په ۲۰۲۶ کال کې به نږدې پنځه میلیونه ښځې، نجونې او ماشومان د خوارځواکۍ د درملنې لپاره مرستو ته اړتیا ولري

هغه ټینګار کړی چې پر ښځو او نجونو د زده‌کړو، کار او ټولنیز ژوند محدودیتونه د هغوی پر بنسټیزو حقونو اغېز کوي او د افغانستان د دوامدار پرمختګ او ثبات پر وړاندې جدي خنډ ګڼل کېږي