اخبار جهان

سپاه: د امریکا پر وړاندې مو د ځوابي عملیاتو په لړ کې د شاه فهد پل په نښه کړی

اشتراک گذاری:

بریانیوز - شنبه ٢۷ سرطان١٤٠٥

تهران – د ایران سپاه پاسداران ادعا کړې چې د امریکا له ځواکونو سره د روانې شخړې په لړ کې یې د ځوابي عملیاتو پر مهال د سعودي عربستان او بحرین ترمنځ د شاه فهد پل بمبار کړی دی

سپاه په یوه بیان کې ویلي، د امریکا د پوځي اقداماتو په غبرګون کې یې په سیمه کې یو شمېر نور اهداف هم په نښه کړي دي. د دوی په وینا، په بحرین، کویټ، قطر، اردن او عراق کې د امریکا پر پوځي اډو هم بریدونه شوي او دا عملیات به د اړتیا په صورت کې دوام ومومي

د سپاه چارواکي ادعا کوي چې دغه بریدونه د امریکا د پوځي حضور او عملیاتو د محدودولو په موخه ترسره کېږي، خو د بریدونو د احتمالي زیانونو او مرګ‌ژوبلې په اړه یې نور جزییات نه دي ورکړي

تر اوسه د امریکا، سعودي عربستان، بحرین او نورو یادو هېوادونو چارواکو د دغو ادعاوو په اړه رسمي غبرګون نه دی ښودلی او د بریدونو راپورونه هم په خپلواکه توګه نه دي تایید شوي

دغه ادعاوې په داسې حال کې مطرح کېږي چې په وروستیو ورځو کې د امریکا او ایران ترمنځ پوځي کړکېچ زیات شوی او د سیمې د امنیتي وضعیت په اړه اندېښنې هم ورسره پراخې شوې دي