امریکا سعودي عربستان او کوېت ته د میلیاردونو ډالرو د وسلو د پلور نوې هوکړې اعلان کړې

امریکا سعودي عربستان او کوېت ته د میلیاردونو ډالرو د وسلو د پلور نوې هوکړې اعلان کړې

بریانیوز - شنبه ٢۷ سرطان١٤٠٥

واشنګټن – د امریکا د بهرنیو چارو وزارت اعلان کړی چې واشنګټن د سعودي عربستان د هوايي دفاعي سیستمونو د پیاوړتیا لپاره د شاوخوا ۱.۹۶ میلیارد ډالرو په ارزښت د وسلو د پلور هوکړه تصویب کړې ده. دغه اقدام په داسې وخت کې کېږي چې په منځني ختیځ کې امنیتي وضعیت لا هم ترینګلی دی او د سیمې هېوادونه د خپلو دفاعي وړتیاوو د لوړولو هڅې ګړندۍ کړې دي

د امریکا د بهرنیو چارو وزارت په خبرپاڼه کې ویلي، د وسلو دغه پلور د امریکا د بهرنۍ تګلارې او ملي امنیت له ستراتیژۍ سره سم ترسره کېږي او موخه یې د یوه مهم سیمه‌ییز متحد د دفاعي وړتیاوو پیاوړي کول دي. د وزارت په وینا، سعودي عربستان که څه هم د ناټو غړی نه دی، خو د فارس خلیج په امنیت، د انرژۍ د نړیوالو لارو په خوندي ساتلو او د سیمې په سیاسي او اقتصادي ثبات کې مهم رول لري

د چارواکو په وینا، په دې هوکړه کې د هوايي دفاع اړوند پرمختللي تجهیزات، تخنیکي ملاتړ، پرزې، روزنیز پروګرامونه او د دفاعي سیستمونو د ساتنې خدمات شامل دي، چې د سعودي عربستان د دفاعي ظرفیت د لوړولو لپاره به ترې کار واخیستل شي

په ورته وخت کې، راپورونه ښيي چې امریکا له کوېت سره هم د میلیاردونو ډالرو په ارزښت د پوځي تجهیزاتو او دفاعي وسایلو د پلور هوکړې کړې دي. امریکايي چارواکي وایي، دغه هوکړې د دواړو هېوادونو ترمنځ د اوږدمهالې امنیتي همکارۍ د پیاوړتیا او د سیمه‌ییزو امنیتي ننګونو پر وړاندې د ګډو دفاعي وړتیاوو د لوړولو لپاره مهم ګام ګڼل کېږي

شنونکي باور لري چې دا پوځي معاملې به د منځني ختیځ د امنیتي توازن او د امریکا د سیمه‌ییز حضور پر راتلونکو پرمختګونو اغېز ولري، په ځانګړي ډول داسې مهال چې د ایران، امریکا او اسرائیل ترمنځ ترینګلتیاوې او د هرمز تنګي د امنیت په اړه اندېښنې زیاتې شوې دي

د امریکا د بهرنیو چارو وزارت ټینګار کړی چې د وسلو دغه پلور د امریکا د قانوني پروسیجرونو له بشپړېدو وروسته عملي کېږي او موخه یې د خپلو متحدانو د دفاعي وړتیاوو لوړول او د سیمې د امنیت او ثبات ملاتړ دی