هلمند : د ۸۰ کلن سړي او ۸ کلنې ماشومې د نکاح هڅه ودرول شوه

هلمند :   د ۸۰ کلن سړي او ۸ کلنې ماشومې د نکاح هڅه ودرول شوه

 بریانیوز دوشنبه ( ۹/ سنبله /۱۴۰۵هـ.ش)

 د هلمند په نادعلي ولسوالۍ کې د یوې اته کلنې ماشومې او یوه ۸۰ کلن سړي د نکاح هڅه د طالبانو د امر بالمعروف او نهې عن المنکر اړوندو کسانو له لوري درول شوې ده

د هلمند د اطلاعاتو او فرهنګ ریاست ویلي، د ماشومې پلار غوښتل خپله اته کلنه لور له دغه سپین‌ږیري سړي سره په نکاح کړي، خو د امر بالمعروف محتسبینو د پېښې له خبر کېدو وروسته د نکاح د ترسره کېدو مخه نیولې ده

د سرچینو په وینا، د ماشومې د نکاح موضوع د هغې د کم عمر له امله د اندېښنې وړ بلل شوې او د چارواکو په مداخله کې د دې واده د ترسره کېدو مخه نیول شوې ده. ځینې راپورونه بیا ادعا کوي چې د ماشومې پلار غوښتل خپله لور د ډېرو پیسو په بدل کې دغه سپین‌ږیري سړي ته ورکړي

د ماشومانو کم‌عمره ودونه په افغانستان کې له اوږدې مودې راهیسې یوه جدي ټولنیزه ستونزه بلل کېږي. د بې‌وزلۍ، اقتصادي فشارونو او د کورنیو د سختو شرایطو له امله ځینې نجونې په کم عمر کې واده کولو ته اړ کېږي

طالبان وايي، د جبري ودونو او د ښځو او نجونو د حقونو د سرغړونو د مخنیوي لپاره اقدامات کوي او د ښځو د حقونو موضوع د دوی د ادعا له مخې د اسلامي شریعت په چوکاټ کې تنظیمېږي

د ماشومانو د حقونو ملاتړي بنسټونه ټینګار کوي چې کم‌عمره ودونه د نجونو پر زده‌کړو، روغتیا، رواني وضعیت او راتلونکي ژوند ژورې اغېزې لري او د ماشومانو د خوندیتوب لپاره باید جدي اقدامات وشي

دا پېښه په داسې وخت کې شوې چې په افغانستان کې د نجونو او ښځو د حقونو، زده‌کړو او ټولنیز ژوند په اړه نړیوالې اندېښنې لا هم دوام لري