د ژغورنې نړیواله کمېټه: نږدې نیمایي افغانان بشري مرستو ته اړتیا لري

اشتراک گذاری:

بریانیوز دوشنبه ( ۹/ سنبله /۱۴۰۵هـ.ش)

کابل — د ژغورنې نړیوالې کمېټې د افغانستان د پروګرامونو مرستیال مشر بوستان فهیم وايي، افغانستان لا هم له ژور بشري ناورین سره مخ دی او نږدې نیمایي وګړي یې د ژوند د لومړنیو اړتیاوو د پوره کولو لپاره بشري مرستو ته اړتیا لري

فهیم په یوه مرکه کې ویلي، شاوخوا ۵۰ سلنه افغانان پر بشري مرستو متکي دي او د ستونزو پر وړاندې د ډېرو کورنیو او ټولنو د مقاومت وړتیا کمه شوې ده

نوموړي د افغانستان پر اقتصادي وضعیت د اقلیمي بدلون او وچکالۍ اغېزې هم جدي بللې دي. د هغه په وینا، د هېواد شاوخوا ۷۰ سلنه وګړي پر کرنې او مالدارۍ خپل ژوند پر مخ وړي او د بارانونو کموالی د میلیونونو خلکو معیشت له ستونزو سره مخ کړی دی

فهیم ټینګار کړی چې د افغانستان روان بشري بحران یوازې د بېړنیو مرستو له لارې نه شي هوارېدای، بلکې د خلکو د اقتصادي پیاوړتیا، د کار زمینه برابرولو او د معیشت د دوام لپاره اوږدمهاله پانګونې ته اړتیا ده

د ژغورنې نړیواله کمېټه وايي، په افغانستان کې یې د روغتیا، تغذیې، پاکو اوبو، خوندیتوب او اقتصادي پیاوړتیا په برخو کې پروګرامونه فعال دي او اوس مهال ۱۵ روغتیايي مرکزونه هم چلوي

د دې ادارې د چارواکو په باور، د افغانستان د بشري ستونزو د کمولو لپاره باید د بېړنیو مرستو ترڅنګ داسې اوږدمهاله پروګرامونه پلي شي چې افغانې کورنۍ وکولای شي په راتلونکي کې له بهرنیو مرستو پرته خپلې لومړنۍ اړتیاوې پوره کړي