ننګرهار : له پاکستانه ستنېدلی افغان له اووه کسیزې کورنۍ سره د ننګرهار پر سیند غاړه په خېمه کې اوسېږي

ننګرهار : له پاکستانه ستنېدلی افغان له اووه کسیزې کورنۍ سره د ننګرهار پر سیند غاړه په خېمه کې اوسېږي

 بریانیوز دوشنبه ( ۹/ سنبله /۱۴۰۵هـ.ش)

ننګرهار — له پاکستانه تازه ستانه شوی ۳۰ کلن افغان ضیاالرحمان وايي، له اووه کسیزې کورنۍ سره یې په ننګرهار کې د سیند پر غاړه په خېمه کې ژوند پیل کړی، خو د سرپناه او لومړنیو اړتیاوو د برابرولو لپاره له جدي ستونزو سره مخ دی

ضیاالرحمان وايي، افغانستان ته د ستنېدو پر مهال یې یوازې ۱۰۰ پاکستانۍ روپۍ له ځان سره لرلې او اوس دومره اقتصادي توان نه لري چې د خپلې کورنۍ لپاره کور په کرایه ونیسي

نوموړي ویلي، له پاکستانه تر ستنېدو وروسته یې د ژوند د بیا پیل لپاره نه کافي پیسې لري او نه د اوسېدو مناسب ځای، له همدې امله اړ شوی چې له خپلې کورنۍ سره په خېمه کې واوسي

د ضیاالرحمان په څېر د پاکستان څخه ستنېدونکو افغان کورنیو د سرپناه، خوړو، روغتیايي خدمتونو او کار موندنې ستونزې د دوی د بېرته ستنېدو له بهیر سره یو ځای زیاتې شوې دي. د مرستندویه ادارو په وینا، ډېری راستنېدونکې کورنۍ د افغانستان له سخت اقتصادي وضعیت سره د مخ کېدو له امله د اوږدمهاله ملاتړ اړتیا لري

د دغو کورنیو لپاره د لنډمهالې سرپناه برابرول، د کار زمینه او د لومړنیو اړتیاوو پوره کول هغه مهمې اړتیاوې دي چې د راستنېدونکو افغانانو د بیا مېشتېدو بهیر یې له جدي ننګونو سره مخ کړی دی

د ضیاالرحمان کیسه د هغو زرګونو افغان کورنیو له ستونزو څخه یوازې یوه بېلګه ده چې له پاکستانه تر ستنېدو وروسته په داسې حال کې خپل هېواد ته راګرځي چې د کور، کار او مالي امکاناتو له کمښت سره مخ دي