تکنولوژی

برېښنا : تخنیکي ستونزې د ترکمنستان وارداتي برېښنا افغانستان کې پرې کړه

اشتراک گذاری:

بریانیوز سه شنبه ( ۱۰/ سنبله /۱۴۰۵هـ.ش)

کابل — د افغانستان برېښنا شرکت وايي، د یکشنبې په ورځ شاوخوا مازیګر پنځه بجې د ترکمنستان له لوري افغانستان ته واردېدونکې برېښنا په دغه هېواد کې د برېښنا شبکې د تخنیکي ستونزې له امله په پنځو نقطو کې پرې شوې ده

د افغانستان برېښنا شرکت په یوه خبرپاڼه کې ویلي، د برېښنا پرې کېدو اغېز د ۲۲۰ کیلوولټ اندخوی، ۱۱۰ کیلوولټ اندخوی، شپږ کیلوولټ فاریاب، ۱۱۰ کیلوولټ بادغیس او ۲۲۰ کیلوولټ هرات پر لینونو شوی دی

د دغه شرکت په وینا، د ترکمنستان د وارداتي برېښنا پرې کېدو له امله بلخ، جوزجان، سرپل، فاریاب، بادغیس او هرات ولایتونه په بشپړه توګه له وارداتي برېښنا بې‌برخې شوي او د سمنګان او بغلان ځینې برخې هم اغېزمنې شوې دي

افغانستان برېښنا شرکت وايي، له ترکمنستان د برېښنا له ادارې «ترکمن‌انرګو» سره یې اړیکې نیولې او له دغه هېواد څخه یې غوښتي چې د برېښنا لېږد افغانستان ته ژر تر ژره بېرته پیل کړي

د شرکت د معلوماتو له مخې، ترکمن لوري ویلي چې د دغه هېواد د برېښنا په ملي شبکه کې پراخه تخنیکي ستونزه رامنځته شوې، چې له امله یې د افغانستان پر لور د برېښنا د لېږد بهیر هم درېدلی دی

تر اوسه د دې تخنیکي ستونزې د هواري او افغانستان ته د برېښنا د بېرته وصلېدو لپاره کره وخت نه دی اعلان شوی