صحّت

ملګري ملتونه: له هرو درېیو افغان ښځو یوه روغتیايي خدمتونو ته د لاسرسي له ستونزې سره مخ ده

اشتراک گذاری:

بریانیوز سه شنبه ( ۱۰/ سنبله /۱۴۰۵هـ.ش)

کابل — د ملګرو ملتونو د ښځو څانګه وايي، په افغانستان کې له هرو درېیو ښځو څخه یوې ویلي چې روغتیايي خدمتونو ته یې لاسرسی د روان وضعیت له امله اغېزمن شوی دی

د ملګرو ملتونو د ښځو څانګې په وینا، په افغانستان کې پر ښځو او نجونو د زده‌کړو او کار محدودیتونو د ښځینه روغتیايي کارکوونکو د روزنې او دندو پر فرصتونو هم منفي اغېز کړی دی

دغه اداره وايي، د ښځینه ډاکټرانو، روغتیاپالو او قابلو د شمېر او فعالیت محدودېدل کولی شي د هغو ښځو لپاره ستونزې لا زیاتې کړي چې د روغتیايي خدمتونو د ترلاسه کولو لپاره ښځینه کارکوونکو ته اړتیا لري

د ملګرو ملتونو د ښځو څانګې ټینګار کړی چې د ښځو روغتیايي خدمتونو ته لاسرسی د هغوی له بنسټیزو حقونو څخه دی او په دې برخه کې محدودیتونه کولی شي د ښځو او نجونو پر روغتیا او ژوند ناوړه اغېزې ولري

دا څرګندونې په داسې حال کې کېږي چې په افغانستان کې د ښځو او نجونو د زده‌کړو، کار او ټولنیز حضور پر محدودیتونو د نړیوالو بنسټونو اندېښنې لا هم دوام لري