اخبار جهان

مدیترانه سمندر: اروپايي ځواکونو په مدیترانه کې روسي د تېلو ټانکر ودرولو

اشتراک گذاری:

بریانیوز سه شنبه ( ۱۰/ سنبله /۱۴۰۵هـ.ش)

مدیترانه — د اروپايي ټولنې اړوند «ایریني» سمندري عملیاتو ځواکونو په مدیترانه سمندر کې د روسیې اړوند د تېلو یوه ټانکر بېړۍ د نړیوالو سمندري قوانینو د احتمالي سرغړونې په شک درولې ده

د اروپايي ټولنې د بهرني سیاست مشره کایا کالاس وايي، د روسیې د تش په نوم «سیوري بېړۍ» له لارې د تېلو پلور د اوکراین پر وړاندې د مسکو د جګړې د تمویل له مهمو سرچینو څخه دی

کالاس په خپله ټولنیزه پاڼه کې ویلي، اروپا هڅه کوي د روسیې د تېلو د غیرقانوني صادراتو لارې محدودې کړي او د دغو بېړیو فعالیتونه وڅاري

د اروپايي چارواکو په وینا، د «ایریني» عملیاتو ځواکونو په وروستیو میاشتو کې د روسیې د سیوري بېړیو په تړاو شپږمه بېړۍ درولې ده

اروپايي ټولنه وايي، د روسیې د سیوري بېړۍ د نړیوالو بندیزونو د مخنیوي او د مسکو د انرژۍ د صادراتو د دوام لپاره کارول کېږي. اروپايي هېوادونه هڅه کوي د دغو بېړیو د فعالیتونو د محدودولو له لارې د روسیې د جګړې پر مالي سرچینو فشار زیات کړي

دا اقدام په داسې حال کې کېږي چې د اوکراین جګړې له دوام سره، اروپايي هېوادونه د روسیې پر انرژۍ او اقتصادي سرچینو د فشارونو د زیاتولو لپاره خپلو اقداماتو ته دوام ورکوي