مقاله

تاشکند : ازبکستان د چین جې‌۱۰ سي جنګي الوتکې ترلاسه کړې

اشتراک گذاری:

بریانیوز چهار شنبه ( ۱۱/ سنبله /۱۴۰۵هـ.ش)

تاشکند — د ازبکستان چارواکو د چین له لوري د پرمختللو جې‌۱۰ سي اې څو مأموریته جنګي الوتکو ترلاسه کول تایید کړي دي. د ازبکستان دولتي ټلوېزیون په خپرو شویو انځورونو کې لږ تر لږه شپږې دغه الوتکې ښودلې دي

د راپورونو له مخې، یادې الوتکې د ازبکستان د قرشي ـ خان‌آباد په پوځي هوايي اډه کې ځای پر ځای شوې دي او د دغه هېواد د هوايي حریم د ساتنې لپاره یې فعالیت پیل کړی دی

ازبکستان تر دې وړاندې د چین د جې‌۱۰ سي اې الوتکو د پېرلو په اړه رسمي جزئیات نه وو خپاره کړي، خو د راپورونو له مخې د تاشکند د احتمالي تړون شمېر تر ۲۴ الوتکو پورې اټکل شوی او لومړنۍ شپږ الوتکې دغه هېواد ته سپارل شوې دي

پوځي شنونکي وايي، د چینایي جنګي الوتکو ترلاسه کول د ازبکستان د هوايي ځواک د عصري کولو د هڅو مهمه برخه ده. دغه هېواد تر ډېره د شوروي له وخت څخه پاتې پوځي تجهیزاتو ته متکي و او اوس هڅه کوي خپل هوايي ځواک د نوې ټکنالوژۍ پر مټ پیاوړی کړي

د جې‌۱۰ سي اې الوتکو ترلاسه کول په منځنۍ اسیا کې د چین د پوځي تجهیزاتو د بازار د پراخېدو نښه هم بلل کېږي. ازبکستان د دې الوتکو په اخیستلو سره د چین تر څنګ د روسیې له دودیزو پوځي تجهیزاتو څخه د خپلې دفاعي اړتیاوو د برابرولو په برخه کې د تنوع پر لور هم ګام اخلي

جې‌۱۰ سي اې یوه څو مأموریته جنګي الوتکه ده چې د هوايي دفاع او نورو پوځي مأموریتونو لپاره کارول کېږي. ازبکستان د دې الوتکو له ترلاسه کولو سره د منځنۍ اسیا په سیمه کې د خپل هوايي ځواک د پیاوړتیا لپاره نوی ګام پورته کړی دی