سفر

برلین : جرمني ۲۲ افغانان له هېواده ایستلي او کابل ته یې ستانه کړي

اشتراک گذاری:

بریانیوز چهار شنبه ( ۱۱/ سنبله /۱۴۰۵هـ.ش)

برلین — د جرمني د کورنیو چارو وزارت وايي، ۲۲ افغان نارینه د سې‌شنبې په سهار له جرمني څخه کابل ته ایستل شوي دي. د جرمني چارواکو په وینا، په دې ډله کې ټول کسان له دغه هېواد له قضايي او جزايي نظام سره مخامخ شوي وو

د جرمني د کورنیو چارو وزارت د دغو کسانو د جرمونو او قضايي دوسیو په اړه نور جزئیات نه دي خپاره کړي. دا ډله د لایپزیګ/هالې له هوايي ډګر څخه په ځانګړې الوتنه کې کابل ته لېږدول شوې ده

د جرمني د چارواکو د وروستیو معلوماتو له مخې، له افغانستان سره د بېرته ستنولو بهیر په روان کال کې پراخ شوی او تر دې وړاندې هم د افغانانو د ایستلو څو الوتنې ترسره شوې دي. د اګست په ۲۵مه هم شاوخوا ۳۰ افغانان له جرمني څخه کابل ته ستانه شوي وو

جرمني په ۲۰۲۱ کال کې د طالبانو له بیا واکمنېدو وروسته افغانستان ته مستقیمې جبري ستنونې ودرولې، خو په ۲۰۲۴ کال کې یې دا بهیر بېرته پیل کړ. له هغه وروسته د افغانانو د بېرته ستنولو لپاره څو چارټر الوتنې ترسره شوې دي

په همدې حال کې، د طالبانو درې کسیز پلاوی هم جرمني ته تللی و چې د افغانانو د بېرته ستنولو او د هویتي اسنادو اړوند تخنیکي مسایلو په اړه له جرمني چارواکو سره خبرې وکړي. د جرمني حکومت ویلي چې د دغو اړیکو موخه تخنیکي همغږي ده او دا د طالبانو د رسمي پېژندنې معنا نه لري

د افغانانو د جبري ستنولو موضوع په داسې حال کې د بحث وړ ده چې د بشري حقونو بنسټونه افغانستان ته د بېرته ستنېدونکو کسانو د امنیت او د هغوی د راتلونکي په اړه اندېښنې څرګندوي