اخبار جهان

واشنګټن : امریکا ۱۲ افغان وګړي مرکزي افریقا جمهوریت ته وشړل

اشتراک گذاری:

بریانیوز چهار شنبه ( ۱۱/ سنبله /۱۴۰۵هـ.ش)

واشنګټن — د امریکا حکومت ۱۲ افغان وګړي د کډوالو د ایستلو د نوې تګلارې په لړ کې د مرکزي افریقا جمهوریت ته لېږدولي دي. د راپورونو له مخې، په دې ډله کې یو ځوان افغان هم شامل دی چې تر دې مخکې یوې امریکايي محکمې د طالبانو له خوا د احتمالي ځورونې او شکنجې د وېرې له امله د هغه د افغانستان ته له ستنولو مخه نیولې وه

د دغه ځوان وکیل او د کډوالو د حقونو د ملاتړ بنسټونه وايي، د هغه د کورنۍ یو شمېر غړو له امریکايي ځواکونو سره په افغانستان کې کار کړی و. د محکمې د اسنادو له مخې، د هغه یو ورور د پخواني افغان ملي پوځ غړی و او بل ورور یې، چې د امریکا له خوا د پیلوټ په توګه روزل شوی و، وروسته د طالبانو په لاس وژل شوی دی

د شړل شویو کسانو الوتکه د شنبې په ورځ د مرکزي افریقا جمهوریت پلازمېنې بانګي ته رسېدلې ده. د کډوالو د حقونو د یوې امریکايي ادارې په وینا، په دې الوتکه کې له ۱۲ افغانانو سربېره اته ایرانیان او د نیپال او نیکاراګوا یو شمېر وګړي هم شامل وو

د کډوالو د ملاتړ بنسټونو د امریکا د حکومت پر دې تګلارې نیوکه کړې او ویلي یې دي چې د هغو کسانو درېیمو هېوادونو ته لېږل، چې له دغو هېوادونو سره څرګندې اړیکې نه لري، د کډوالو د قانوني خوندیتوب په اړه جدي پوښتنې راپورته کوي

دا د امریکا له خوا مرکزي افریقا جمهوریت ته د افغانانو د لېږلو دویمه ورته الوتنه بلل شوې ده، چې د افغانانو د کډوالۍ او جبري ستنولو د پالیسۍ په اړه یې په واشنګټن کې د بشري حقونو د بنسټونو اندېښنې لا زیاتې کړې دي