اخبار جهان

دوشنبه: د افغانستان د وضعیت په اړه د تاجکستان اندېښنې درک کوو

اشتراک گذاری:

بریانیوز پنجشنبه ( ۱۲/ سنبله /۱۴۰۵هـ.ش)

دوشنبه — د روسیې ولسمشر ولادیمیر پوتین د تاجکستان له ولسمشر امامعلي رحمان سره په لیدنه کې ویلي، مسکو د افغانستان د وضعیت په اړه د تاجکستان له امنیتي اندېښنو پوره خبر دی او د دغه هېواد د امنیت د پیاوړتیا لپاره به ورسره ګډ کار ته دوام ورکړي

پوتین ویلي، روسیه د تاجکستان امنیت ته ځانګړی اهمیت ورکوي او د افغانستان له وضعیت سره تړلو احتمالي ګواښونو د مخنیوي لپاره د دواړو هېوادونو ترمنځ همغږي مهمه ده

د روسیې ولسمشر ټینګار کړی چې مسکو او دوشنبه د سیمه‌ییز امنیت په برخه کې ګډې ګټې لري او روسیه چمتو ده چې د تاجکستان د امنیتي وړتیاوو د پیاوړتیا لپاره خپلې همکارۍ روانې وساتي

امامعلي رحمان له اوږدې مودې راهیسې د افغانستان له خاورې د احتمالي امنیتي ګواښونو په اړه اندېښنه څرګندوي. تاجکستان له افغانستان سره اوږده ګډه پوله لري او د سرحدي امنیت د ټینګښت لپاره یې په تېرو کلونو کې له روسیې سره پوځي او امنیتي همکاریو ته پراختیا ورکړې ده

د پوتین دغه څرګندونې په داسې حال کې دي چې د افغانستان وضعیت د منځنۍ اسیا د هېوادونو او روسیې ترمنځ د امنیتي بحثونو له مهمو موضوعاتو څخه دی. مسکو ټینګار کوي چې د افغانستان ثبات د ټولې سیمې پر امنیت مستقیم اغېز لري