نیپال: د اقلیمي بدلون له امله له هند، چین او امریکا د تاوان غوښتنه کوو

نیپال: د اقلیمي بدلون له امله له هند، چین او امریکا د تاوان غوښتنه کوو

 بریانیوز پنجشنبه ( ۱۲/ سنبله /۱۴۰۵هـ.ش)

کتمندو — د نیپال د بهرنیو چارو وزیر شیشر کهنار ویلي، هېواد یې د وروستیو ویجاړونکو سېلابونو له امله له نړیوالې ټولنې د خیرات او مرستې غوښتنه نه کوي، بلکې غواړي د اقلیمي بدلون د اغېزو د جبران لپاره له هغو هېوادونو تاوان وغواړي چې د شنو خونو د ګازونو په خپرولو کې لویه ونډه لري

کهنار ویلي، نیپال د نړۍ د شنو خونو د ګازونو په خپرولو کې ډېره کمه ونډه لري، خو د اقلیمي بدلون له سختو اغېزو سره مخ دی. نوموړي هند، چین او امریکا د لویو صنعتي فعالیتونو او د شنو خونو د ګازونو د لوړې کچې خپرولو له امله د اقلیمي زیانونو د جبران مسؤل بللي دي

د نیپال د بهرنیو چارو وزیر ټینګار کړی چې د هېواد اوسنی ناورین باید یوازې د بشري مرستو له زاویې ونه کتل شي، بلکې هغه هېوادونه چې د نړۍ په کچه د ککړتیا په رامنځته کولو کې لویه ونډه لري، باید د اقلیمي بدلون له امله زیانمنو هېوادونو ته د تاوان ورکولو مسؤلیت هم ومني

نوموړي دا څرګندونې وروسته له هغې کړې چې په نیپال کې وروستیو سېلابونو پراخې ویجاړۍ رامنځته کړې دي. د ورکړل شویو معلوماتو له مخې، په دغو سېلابونو کې د مړو شمېر نږدې ۳۰۰۰ تنو ته رسېدلی او زرګونه نور کسان اغېزمن شوي دي

د سېلابونو له امله ګڼ کورونه، سړکونه، پلونه او نورې بنسټیزې زېربناوې ویجاړې شوې دي او د ژغورنې ډلې لا هم د ورکو کسانو د موندلو لپاره هڅې کوي

نیپال چې د همالیا په غرنیو سیمو کې پروت دی، د اقلیمي بدلون له امله د یخچالونو د وېلې کېدو، سختو بارانونو، سېلابونو او ځمکې ښویېدنې له زیاتېدونکو ګواښونو سره مخ دی. د دغه هېواد چارواکي وايي، د وروستیو ناورینونو کچه ښيي چې د اقلیمي بدلون اغېزې د کم عاید لرونکو هېوادونو لپاره تر بل هر وخت درنې تمامېږي