سیاست

ایرلنډ: د افغان ښځو له ګډون پرته تلپاتې سوله ناشونې ده

اشتراک گذاری:

بریانیوز شنبه ( ۱۴/ سنبله /۱۴۰۵هـ.ش)

ژنیو — د ملګرو ملتونو په جنیوا دفتر کې د ایرلنډ استازي لاورنس سمس ویلي، په افغانستان کې د ښځو له بشپړ او اغېزمن ګډون پرته تلپاتې سوله او ثبات ناشوني دي

سمس ټینګار کړی چې د بشري حقونو د سرغړونو حساب ورکونه هغه مهال معنا پیدا کوي چې د قربانیانو غږ واورېدل شي او د هغوی تجربې د عدالت او حساب ورکونې په بهیر کې په پام کې ونیول شي. ایرلنډ هم د طالبانو د واکمنۍ له پیل راهیسې د افغان ښځو د حقونو او د حساب ورکونې د پیاوړتیا ملاتړ کړی دی

بلخوا، د «ښځې د افغانستان لپاره» بنسټ په جنیوا کې د افغانستان د حساب ورکونې لپاره نوی لارښود چوکاټ وړاندې کړی دی. دغه چوکاټ د موجودو نړیوالو حساب ورکونې میکانیزمونو ارزونه کوي او د مدني ټولنو او فعالانو د رول د پیاوړتیا لپاره لارې چارې وړاندې کوي

د دې چوکاټ د جوړولو په بهیر کې د ښځو، مدني ټولنو، د بشري حقونو د فعالانو او نورو اړوندو بنسټونو نظرونه اخیستل شوي دي. په نړیواله کچه هم د افغانستان د راتلونکي لپاره د ښځو د برابر او معنا لرونکي ګډون غوښتنه په وار وار شوې ده

ملګري ملتونه ټینګار کوي چې د ښځو له ګډون پرته د افغانستان د شخړو د هواري او دایمي سولې لپاره هڅې نیمګړې پاتې کېږي