مقاله

اسلام‌اباد: د نشه‌ يي توکو نړیواله شبکه مو له منځه وړې

اشتراک گذاری:

بریانیوز شنبه ( ۱۴/ سنبله /۱۴۰۵هـ.ش)

اسلام‌اباد — د پاکستان د نشه‌ يي توکو پر وړاندې د مبارزې ادارې ویلي، چې له امریکا او سریلانکا سره د استخباراتي معلوماتو له شریکولو وروسته یې د نشه‌ يي توکو یوه نړیواله شبکه له منځه وړې ده

د دغې ادارې په وینا، په ترسره شویو عملیاتو کې ټولټال ۶۷۱ کیلوګرامه مېتامفیتامین نیول شوي، چې اټکلي ارزښت یې شاوخوا ۲۱ میلیونه ډالره ښودل شوی دی

چارواکي وايي، د کراچۍ په بندر کې د یوه کانټینر د پلټنې پر مهال ۲۰۰ کیلوګرامه مېتامفیتامین وموندل شول او د احسان‌الله په نوم یو افغان وګړی، چې د چارواکو په وینا د دغې شبکې مشر و، ونیول شو

د پاکستان د نشه‌يي توکو پر وړاندې د مبارزې ادارې زیاته کړې چې له دې وروسته د امریکا او سریلانکا له اړوندو ادارو سره په ګډه عملیات ترسره شول، چې په پایله کې یې د سریلانکا د کولمبو په بندر کې ۴۷۱ کیلوګرامه نور مېتامفیتامین کشف او ضبط شول

چارواکي وايي، د استخباراتي معلوماتو شریکول او د هېوادونو ترمنځ ګډ عملیات د نشه‌يي توکو د نړیوالو شبکو د پېژندلو او مخنیوي لپاره مهم رول لري