پخواني ولسمشر حامد کرزي: تر هغه چې نجونې ښوونځیو ته ستنې نه شي، د اسلامي امارت ستاینه نه کوم

اشتراک گذاری:

بریانیوز شنبه ( ۱۴/ سنبله /۱۴۰۵هـ.ش)

کابل — د افغانستان پخواني ولسمشر حامد کرزي ویلي، تر هغه به د اسلامي امارت ستاینه ونه کړي چې افغان نجونو ته د زده‌کړو د دوام اجازه نه وي ورکړل شوې

کرزي ټینګار کړی چې د نجونو د زده‌کړې حق باید بېرته ورکړل شي او ښوونځي باید د ټولو افغان ماشومانو پر مخ پرانیستي وي

نوموړي همداراز په افغانستان کې د سیاسي ګډ ژوند او تفاهم غوښتنه کړې ده. کرزي ویلي، اسلامي امارت او مخالفې ډلې دواړه افغانان دي او د هېواد ستونزې باید د خبرو، جوړجاړي او ګډ تفاهم له لارې حل شي

د افغانستان پخواني ولسمشر زیاته کړې چې افغانان نور د جګړو، شخړو او د واک د پرله‌پسې بدلونونو یوه بله دوره نه غواړي، بلکې هېواد د داسې سیاسي حل لارې اړتیا لري چې ټول لوري پکې د ګډون او تفاهم زمینه ولري

کرزي له دې وړاندې هم په وار وار د افغان نجونو د زده‌کړو د حق د بېرته ورکړې غوښتنه کړې او د هېواد د سیاسي ستونزو د حل لپاره یې پر ملي تفاهم ټینګار کړی دی