برېښنا : د میرویس عزیزي د برېښنا ستره پروژه؛ چینایي متخصصان افغانستان ته ځي

برېښنا : د میرویس عزیزي د برېښنا ستره پروژه؛ چینایي متخصصان افغانستان ته ځي

 بریانیوز دوشنبه ( ۱۶/ سنبله /۱۴۰۵هـ.ش)

کابل — افغان سوداګر او د «عزیزي انرژۍ» مشر میرویس عزیزي وايي، د چین له یوه شرکت سره یې د افغانستان د برېښنا د تولید د پروژو په اړه خبرې کړې او ټاکل شوې چې د دغه شرکت یو تخنیکي پلاوی افغانستان ته سفر وکړي

عزیزي ویلي، چینایي متخصصان به د برېښنا د تولید په ځانګړي ډول د ډبرو سکرو د کارونې په اړه تخنیکي ارزونې او څېړنې ترسره کړي. د نوموړي په وینا، دغه پلاوی به د «عزیزي انرژۍ» او چینايي «رون پاور» شرکت ترمنځ د شوې هوکړې له مخې افغانستان ته راشي

د عزیزي څرګندونې په داسې حال کې دي چې نوموړي له څه مودې راهیسې په افغانستان کې د ۱۰ زره مېګاواټه برېښنا د تولید د یوه ستر پروګرام ژمنه کړې ده. د افغانستان د اقتصادي چارو د ریاست د معلوماتو له مخې، عزیزي انرژۍ مخکې ویلي وو چې د دې پروژې لپاره یې اړین تخنیکي وسایل هم پېرلي دي

د دغې سترې طرحې د لومړنیو برخو په اړه هم یو شمېر چارې ترسره شوې دي. د حکومت د معلوماتو له مخې، د کابل، پروان او غزني لپاره د ټولټال ۳۳۱ مېګاواټه لمریزې برېښنا د تولید د پروژو د امکان‌سنجۍ چارې بشپړې شوې او د ځینو پروژو عملي کار هم پیل شوی دی

د حکومت په وینا، د عزیزي انرژۍ د ۱۰ زره مېګاواټه پروګرام یوه برخه د بغلان، بلخ، جوزجان، هرات او بامیان په ګډون په بېلابېلو ولایتونو کې د برېښنا د تولید له پروژو سره تړاو لري. د ۲۰۲۶ کال په فبرورۍ کې حکومت ویلي وو چې د دې پروګرام اړوند د پنځو پروژو، چې ګډ ظرفیت یې ۸۴۵ مېګاواټه دی، عملي چارې پیل شوې دي

خو د دې سترې ژمنې د اعلان او د ټولو ۱۰ زره مېګاواټه ظرفیت د عملي کېدو ترمنځ لا هم د پام وړ واټن موجود دی. د تازه څرګندونو له مخې، د ځینو برخو لپاره لا تخنیکي ارزونې او مطالعات روان دي، چې ښيي د ټول پروګرام بشپړ عملي کېدل به وخت وغواړي

عزیزي انرژۍ په وروستیو میاشتو کې له چینایي شرکتونو سره د برېښنا په برخه کې خپلې اړیکې هم پراخې کړې دي. د اګست په میاشت کې د عزیزي انرژۍ او شانګهای الکټریک ترمنځ د راتلونکو څلورو کلونو لپاره د درې زره مېګاواټه برېښنا د تولیدي پروژو د جوړولو په اړه هوکړه هم اعلان شوې وه

افغانستان له کلونو راهیسې د برېښنا د کمښت او له ګاونډیو هېوادونو څخه د برېښنا پر وارداتو د لوړې کچې اتکا له ستونزې سره مخ دی. که د عزیزي انرژۍ ستره طرحه په بشپړه توګه عملي شي، د هېواد د کورني تولید ظرفیت به د پام وړ لوړ او د وارداتي برېښنا اړتیا به کمه کړي؛ خو د دې هدف د ترلاسه کولو لپاره د پانګونې، تخنیکي مطالعاتو، تولیدي مرکزونو او د لېږد شبکې جوړول لا ډېر کار ته اړتیا لري