اخبار جهان

قطر: افغانستان لا هم له پېچلي بشري ناورین سره مخ دی

اشتراک گذاری:

بریانیوز سه شنبه ( ۱۷/ سنبله /۱۴۰۵هـ.ش)

قطر یو ځل بیا د افغانستان په تړاو د منځګړیتوب، د خبرو اترو د کوربه‌توب او د نړیوالې اجماع او همغږۍ لپاره د زمینې برابرولو په برخه کې پر خپل فعال دریځ ټینګار کړی دی

د ملګرو ملتونو په ژنیو دفتر کې د قطر دایمي ماموریت دویم سکرتر عبدالله بن علي بهزاد دا څرګندونې د بشري حقونو شورا په ۵۳مه غونډه کې د افغانستان د بشري حقونو د وضعیت په اړه له ځانګړي راپور ورکوونکي سره د متقابل بحث پر مهال کړې دي

بهزاد ویلي، افغانستان لا هم د نړۍ له تر ټولو لویو او پېچلو بشري ناورینونو سره مخ دی او نږدې ۲۲ میلیونه کسان، چې د هېواد د ټول نفوس شاوخوا ۴۵ سلنه جوړوي، بشري مرستو ته اړتیا لري

د نوموړي په وینا، په افغانستان کې بشري وضعیت د ګڼو عواملو له امله لا پسې خراب شوی دی. هغه د ناامنۍ، اقتصادي کمزورۍ، اقلیمي بدلونونو، د خلکو بې‌ځایه کېدو، د بودجې او بشري مرستو د کمښت، د میلیونونو افغان کډوالو د بېرته ستنېدو او د بندیزونو د دوام ترڅنګ د افغانستان د شتمنیو کنګل پاتې کېدل هم د دغه ناورین له مهمو لاملونو څخه بللي دي

د قطر استازي ټینګار کړی چې د افغانستان د ستونزو د هواري لپاره یوازې بشري مرستې بسنه نه کوي، بلکې د نړیوالې ټولنې ترمنځ دوامداره همغږي او د خبرو اترو له لارې د سیاسي حل لپاره هڅې هم اړینې دي

قطر په تېرو کلونو کې د افغانستان په تړاو د نړیوالو او افغان لورو ترمنځ د خبرو اترو د کوربه هېواد په توګه مهم رول ترسره کړی دی. دغه هېواد په ۲۰۲۰ کال کې د امریکا او طالبانو د خبرو کوربه و چې په پایله کې یې د دوحې تړون لاسلیک شو.

دوحې وروسته هم د افغانستان په اړه د نړیوالو ناستو او سیاسي بحثونو د کوربه‌توب لپاره خپل چمتووالی ښودلی دی. د قطر چارواکي وايي، د افغانستان د راتلونکي لپاره د سیمه‌ییزو او نړیوالو لورو ترمنځ دوامداره خبرې او همغږي مهمه ده

د بشري حقونو په برخه کې هم د ملګرو ملتونو ځانګړي راپور ورکوونکي پر افغان چارواکو د ښځو او نجونو د حقونو د خوندیتوب، زده‌کړو او کار ته د هغوی د لاسرسي او په ټولنیز ژوند کې د ګډون د زمینه برابرولو غوښتنه کړې ده

قطر وايي، د افغانستان د بشري وضعیت د ښه کېدو لپاره د نړیوالې ټولنې دوامداره ملاتړ، بشري مرستې او د سیاسي خبرو له لارې د ستونزو د حل هڅې باید هممهاله روانې وساتل شي