دښځو حقوق: هره ښځه او نجلۍ حق لري چې د خوندیتوب احساس وکړي

دښځو حقوق: هره ښځه او نجلۍ حق لري چې د خوندیتوب احساس وکړي

 بریانیوز سه شنبه ( ۱۷/ سنبله /۱۴۰۵هـ.ش)

 ملګرو ملتونو ټینګار کړی چې هره ښځه او نجلۍ حق لري چې په هر ځای کې د خوندیتوب، درناوي او برابرۍ احساس وکړي او له هر ډول تاوتریخوالي څخه خوندي وي

دغه سازمان پر حکومتونو غږ کړی چې د ښځو او نجونو پر وړاندې د جنسیت پر بنسټ د تاوتریخوالي د مخنیوي لپاره جدي او اغېزمن اقدامات وکړي او په دې برخه کې پانګونه زیاته کړي. ملګري ملتونه وايي، د ښځو پر وړاندې تاوتریخوالی لا هم په بېلابېلو ټولنو کې یوه جدي ستونزه ده او د مخنیوي لپاره یې قانوني، ټولنیز او اقتصادي اقدامات اړین دي

په افغانستان کې بیا ښځې او نجونې د طالبانو د حکومت له لوري له پراخو محدودیتونو سره مخ دي. ملګرو ملتونو ویلي چې پر ښځو او نجونو لګېدلي محدودیتونه د هغوی د زده‌کړو، کار، عامه ژوند او په ټولنه کې د بشپړ ګډون پر وړاندې جدي خنډونه دي

د ملګرو ملتونو سرمنشي انتونیو ګوترېش د سپټمبر پر شپږمه هم د افغانستان د ښځو او نجونو پر وضعیت اندېښنه څرګنده کړې او له طالبانو یې غوښتي چې ټول هغه محدودیتونه لغوه کړي چې د ښځو او نجونو پر وړاندې لګېدلي دي

نوموړي په ځانګړي ډول د افغان ښځینه کارکوونکو لپاره د ملګرو ملتونو دفترونو ته د خوندي او بې خنډه لاسرسي او د هغوی د کار کولو د حق د بېرته تأمین غوښتنه کړې ده

ملګري ملتونه وايي، د ښځو او نجونو بشپړ، برابر او معنا لرونکی ګډون د افغانستان د ثبات، اقتصادي پرمختګ او له نړیوالې ټولنې سره د بیا یوځای کېدو لپاره هم مهم دی