اخبار جهان

امریکا: زلمی خلیلزاد د حکومت استازیتوب نه کوي

اشتراک گذاری:

بریانیوز سه شنبه ( ۱۷/ سنبله /۱۴۰۵هـ.ش)

کابل — د امریکا د بهرنیو چارو وزارت ویلي چې د افغانستان لپاره د دغه هېواد پخوانی ځانګړی استازی زلمی خلیلزاد اوس د امریکا د حکومت کارکوونکی نه دی او په کابل کې له طالب چارواکو سره د هغه خبرې د واشنګټن رسمي دریځ نه څرګندوي

د امریکا د بهرنیو چارو وزارت دا څرګندونې وروسته له هغې کړې دي چې خلیلزاد په کابل کې له طالب چارواکو سره لیدلي او خبرې یې کړې دي. وزارت ټینګار کړی چې نوموړی د امریکا د اوسني حکومت استازیتوب نه کوي

زلمی خلیلزاد د ۲۰۱۸ کال له سپټمبر څخه تر ۲۰۲۱ کال پورې د افغانستان د سولې او پخلاینې په چارو کې د امریکا ځانګړی استازی و. د امریکا د بهرنیو چارو وزارت په پخوانۍ رسمي پاڼه کې هم د هغه د دندې پای د ۲۰۲۱ کال د اکتوبر ۱۹مه ښودل شوی دی

خلیلزاد د امریکا او طالبانو ترمنځ د دوحې د تړون په خبرو کې مهم رول درلود او د ۲۰۲۰ کال د فبرورۍ پر ۲۹مه یې له ملا عبدالغني برادر سره د دغه تړون لاسلیک هم کړی و

د امریکا د بهرنیو چارو وزارت تازه څرګندونې په داسې وخت کې کېږي چې د افغانستان په اړه د واشنګټن او طالبانو ترمنځ رسمي اړیکې لا هم له ګڼو سیاسي او امنیتي مسایلو سره تړلې دي. خلیلزاد، که څه هم نور رسمي دولتي مسئولیت نه لري، په وروستیو کلونو کې یې د افغانستان په اړه خپل سیاسي او ډیپلوماتیک فعالیتونه دوام ورکړي دي