د بهرنیو چارو وزارت : متقي او د یوناما مشرې د راستنېدونکو کډوالو پر اړتیاوو او بشري مرستو خبرې کړې

د بهرنیو چارو وزارت : متقي او د یوناما مشرې د راستنېدونکو کډوالو پر اړتیاوو او بشري مرستو خبرې کړې

(بریانیو دوشنبه (۲۷/ میزان /۱۴۰۵هـ.ش

د افغانستان د بهرنیو چارو وزیر امیرخان متقي د ملګرو ملتونو د سرمنشي له ځانګړې استازې او د یوناما له مشرې رزا فاطمه سره لیدلي او د بشري مرستو، راستنېدونکو کډوالو د اړتیاوو او د افغانستان او ملګرو ملتونو ترمنځ د همکاریو پر پراختیا یې خبرې کړې دي

د بهرنیو چارو وزارت د خبرپاڼې له مخې، په دې لیدنه کې دواړو لورو د راستنېدونکو کډوالو د بشري اړتیاوو د پوره کولو او د مرستو د اغېزمن مدیریت په اړه بحث کړی دی. هغوی ټینګار کړی چې بشري مرستې او اقتصادي فعالیتونه باید له سیاسي مسایلو جلا وساتل شي او په افغانستان کې د پراختیايي او بنسټیزو پروژو ملاتړ باید زیات شي

په دې لیدنه کې د افغانستان په اړه د ملګرو ملتونو په راپورونو کې د کره او باوري معلوماتو پر کارولو، د هېواد د واقعیتونو پر متوازن انعکاس او له اړوندو افغان ادارو سره پر همغږۍ هم ټینګار شوی دی

دواړو لورو همداراز د اقلیمي بدلونونو، اوبو، د خصوصي سکټور د ملاتړ او د نشه‌يي توکو پر وړاندې د مبارزې په برخو کې د همکاریو په اړه خبرې کړې دي. دغه موضوعات د دوحې د بهیر په چوکاټ کې د کاري ډلو د فعالیتونو او راتلونکو غونډو له لارې هم څېړل کېږي

د خبرپاڼې له مخې، په دې لیدنه کې د کوکنارو د کښت او نشه‌يي توکو پر وړاندې د ترسره شویو هڅو ستاینه شوې او د افغانستان او ملګرو ملتونو ترمنځ د رغنده تعامل او همکاریو پر دوام ټینګار شوی دی