کډوال: ترکیې کې ۵۸ افغان او پاکستاني کډوال نیول شوي؛ د ایستلو پرېکړه یې شوې

اشتراک گذاری:

(بریانیو دوشنبه (۲۷/ میزان /۱۴۰۵هـ.ش

د ترکیې پولیسو په ادرنه او قیصریه ښارونو کې ۵۸ افغان او پاکستاني کډوال د قانوني اسنادو د نشتوالي او بې‌اسناده تګ راتګ په تور نیولي دي. همداراز، په قیصریه کې څلور کسان د جعلکارۍ او د کډوالو د لېږدولو په تور نیول شوي دي

د رسنیو د راپورونو له مخې، په ادرنه ښار کې ۲۷ کډوال او په قیصریه کې ۳۱ افغان کډوال د پولیسو د پلټنو پر مهال نیول شوي دي. د نیول شویو کسانو د اسنادو او وضعیت له ارزونې وروسته، چارواکو ویلي چې کډوال به له قانوني پړاوونو تر بشپړېدو وروسته له ترکیې وایستل شي

په قیصریه کې د څلورو نورو کسانو نیول هم د کډوالو د لېږدولو او جعلکارۍ له قضیو سره تړاو لري. خو د دغو کسانو د هویت او د هغوی د فعالیتونو په اړه نور جزئیات نه دي خپاره شوي

د ورکړل شویو معلوماتو له مخې، ترکیې د روان کال له پیل راهیسې تر ۳۰ زرو ډېر افغان کډوال د قانوني اسنادو د نشتوالي له امله نیولي دي. دا وضعیت په ترکیه کې د افغان کډوالو د استوګنې، تګ راتګ او قانوني اسنادو د ستونزو د دوام څرګندونه کوي