سفرهیئت بلند پایۀ تاجیکستان به کابل؛ خواست های دوشنبه چیست؟

امروز کابل میزبان یکی از کم‌سابقه‌ترین سفرهای دیپلماتیک تاجیکستان در سال‌های اخیر بود.

بریانیوز:(۲۵عقرب/لړم) منابع تایید کرده‌اند که روز شنبه ۲۴ عقرب ۱۴۰۴،  هیئتی بلند پایه از تاجیکستان، شامل مقام‌های ارشد وزارت خارجه، نهادهای امنیتی و سایر مسوولان کلیدی، وارد پایتخت شده‌اند.

به گفتۀ منابع خبری، هدف این سفر گسترش و تقویت روابط سیاسی، اقتصادی و امنیتی میان تاجیکستان و حکومت سرپرست امارت اسلامی  اعلام شده است. منابع افزودند که در کنار موضوعات کلان روابط دوجانبه، بحث دربارۀ سفارت حکومت سرپرست امارت اسلامی  در دوشنبه و سایر مسایل جزئی نیز در دستور کار قرار دارد.

در سال‌های گذشته، روابط افغانستان و تاجیکستان فراز و نشیب‌های زیادی را پشت سر گذاشته؛ از اختلاف‌های سیاسی گرفته تا چالش‌های مرزی و پروندهٔ مهاجران. اما اکنون ظاهراَ فضای تازۀ میان کابل و دوشنبه در حال شکل گیری است.

تاجیکستان در سه سال گذشته یکی از منتقدترین کشورهای منطقه نسبت به حکومت سرپرست امارت اسلامی بوده، اما اعزام هیئت رسمی بلندپایه نشان می‌دهد که دوشنبه نیز، مانند بسیاری از همسایگان افغانستان، در حال حرکت به سمت یک رویکرد عمل‌گرایانه‌تر است.

در شرایطی که افغانستان به‌دنبال گسترش روابط خارجی و ایجاد مسیرهای تازۀ اقتصادی و سیاسی در منطقه است، آیا نقش همسایه شمالی‌اش، تاجیکستان، در معادلات آینده می‌تواند بیش از گذشته برجسته باشد یا خیر؟ زمان پاسخ خواهد داد.