حملۀ پهپادی در مرز تاجیکستان با افغانستان باعث کشته شدن سه شهروند چینی شد

حملۀ پهپادی در مرز تاجیکستان با افغانستان باعث کشته شدن سه شهروند چینی شد

بریانیوز:(۸قوس/ لیندی) مقامات تاجیکستان اعلام کرده‌اند که سه شهروند چین در حملهٔ مسلحانه «از خاک افغانستان» به یک منطقۀ مرزی در جنوب تاجیکستان کشته شده‌اند.

وزارت خارجۀ تاجیکستان در خبرنامهٔ گفته است که این حمله شب گذشته ۷قوس در محدودهٔ یگان مرزی «یال» واقع در ناحیه شمس‌الدین شاهین، در ولایت ختلان این کشور رخ داده و شهروندان چین برای یک شرکت محلی در جنوب تاجیکستان کار می‌کرده‌اند.

مقامات تاجیکستان حملۀ اخیر را به‌شدت محکوم کرده و از حکومت سرپرست امارت اسلامی در افغانستان خواسته اند تا اقدامات مؤثر را برای تأمین ثبات و امنیت در مرز دولتی دو کشور همسایه اتخاذ کند.

در بیانیۀ وزارت خارجۀ تاجیکستان آمده است که «با وجود تلاش‌های پیگیرانۀ طرف تاجیکستان برای حفظ امنیت و ایجاد فضای همکاری سودمند متقابل در مناطق مرزی این کشور با افغانستان، گروه‌های جنایتکاری که در خاک کشور همسایه حضور دارند، همچنان به انجام اقداماتی که هدف آن‌ها بی‌ثبات‌سازی اوضاع در نواحی مرزی است، ادامه می‌دهند.»

هنوز هیچ گروهی مسئولیت این حمله را برعهده نگرفته است.

حکومت سرپرست امارت اسلامی هنوز در این مورد واکنش نشان نداده است اما در گذشته مقامات این حکومت بارها چنین گزارش‌ها را رد کرده و گفته‌اند که به هیچ گروهی اجازه نمی‌دهند که از خاک افغانستان علیه کشوری دیگری استفاده کند.

یک سال پیش نیز در حملهٔ مشابه به این منطقۀ مرزی، یک شهروند چین کشته و چهار چینی دیگر زخمی شده بودند. مقامات تاجیکستان در آن زمان نیز گفتند که آن حمله از خاک افغانستان صورت گرفت.

اما به گفتۀ منابع رسمی در تاجیکستان، برخلاف موارد قبلی، حملۀ شب گذشته «با استفاده از یک پهپاد حامل نارنجک انجام شده است.»

افرادی که کشته شدند برای شرکت‌های محلی‌ای کار می‌کردند که مشغول استخراج طلا بودند.

درعین حال، سفارت چین در تاجیکستان، روز جمعه با صدور بیانیۀ، به کشته شدن سه شهروند چینی در مرز افغانستان و تاجکستان واکنش نشان داد. این اداره از شهروندان چینی خواست از نزدیک شدن به مرز افغانستان پرهیز کنند.

در بیانیۀ سفارت چین آمده است: «سفارت چین در تاجکستان حمله مسلحانۀ را که چهارشنبه شب ۷ قوس در ولسوالی مرزی شمس‌الدین‌شوهین در ولایت ختلان و نزدیک مرز افغانستان رخ داد و در آن سه شهروند چین کشته و یک تن زخمی شد، به‌شدت محکوم می‌کند.»

در بیانیه، این رویداد یک «اقدام جنایی سنگین» توصیف شده و گفته شده که سفارت بلافاصله سازوکار پاسخ اضطراری خود را فعال کرده و پنج‌شنبه صبح یک هیأت کاری را به محل رویداد اعزام نموده تا امور پیگیری را انجام دهد.

سفارت چین همچنین از مقام‌های تاجکستان خواسته تا یک تحقیق همه‌جانبه انجام دهند، عاملان این حمله را به عدالت بسپارند و تدابیر مؤثری برای تأمین امنیت شهروندان، نهادها و پروژه‌های چین در این کشور اتخاذ کنند.

سفارت چین همچنین هشدار اضطراری صادر کرده و از شهروندان چینی در تاجکستان خواسته که اوضاع امنیتی منطقه را از نزدیک دنبال کنند و از سفر یا کار در نزدیکی مرز تاجکستان و افغانستان خودداری نمایند.

وزارت خارجه حکومت سرپرست امارت اسلامی روز جمعه۸قوس اعلام کرد که آمادۀ «تبادل اطلاعات، همکاری‌های تخنیکی و ارزیابی‌های مشترک برای شناسایی عوامل» کشتن سه شهروند چین در منطقۀ مرزی تاجیکستان است.

در اعلامیۀ وزارت خارجه حکومت سرپرست آمده است: «بر اساس ارزیابی ابتدایی و اطلاعات نهادهای ذی‌ربط، حلقۀ دخیل در این رویداد همان گروهی است که تلاش دارد میان کشورهای منطقه آشوب، بی‌ثباتی و بی‌اعتمادی ایجاد کند.»

در این اعلامیه، حکومت سرپرست اطمینان داده‌اند که برای تبادل اطلاعات، همکاری‌های تخنیکی و ارزیابی‌های مشترک جهت شناسایی عوامل این رویداد، همکاری کامل خواهند کرد.

ازسوی دیگر، در واکنش به کشته‌شدن سه کارگر چینی در تاجکستان، محمد صادق‌خان، نمایندۀ خاص پاکستان گفته که: استفاده مکرر عناصر تروریستی از خاک افغانستان و ادامۀ حضور آن‌ها تحت حمایت طالبان افغان، موضوعی بسیار نگران‌کننده برای کل منطقه و جامعه بین‌المللی است.

صادق‌خان این حمله را تروریستی و شنیع خوانده و گفته که اسلام‌آباد آن را به‌طور قاطع محکوم می‌کند.

نمایندۀ خاص پاکستان در ادامه گفته که استفاده از طیارۀ بدون‌سرنشینِ در این حادثه، نشان‌دهندۀ شدت تهدیدی است که از خاک افغانستان سرچشمه می‌گیرد و جسارت عاملان آن را برجسته می‌سازد.

او افزوده است، به‌عنوان کشوری که بارها قربانی حملات تروریستی طراحی‌شده از خاک افغانستان شده، مردم پاکستان پیوسته تأکید کرده که نباید از خاک افغانستان برای انجام اقدامات تروریستی علیه همسایگان یا هر کشور دیگری استفاده شود.

نماینده خاص پاکستان خواهان اقدام عملی، قابل‌سنجش و قابل‌تأیید علیه عاملان، پشتیبانان، تسهیل‌کنندگان و تأمین‌کنندگان مالی گروه‌های تروریستی فعال از خاک افغانستان شده و آن را تنها راه رسیدگی به این تهدید فزاینده دانسته است.

این درحالی است که حکومت سرپرست همواره حضور گروه‌های تروریستی در افغانستان را رد کرده‌اند.