کابل – د طالبانو د ادارې ویاند : ذبیح‌ الله مجاهد: لوېدیځ لا هم د جګړې له پخوانیو سیاستونو نه دی وتلی

 ذبیح‌ الله مجاهد ویلي، چې لوېدیځ هېوادونه لا هم له پخوانیو جګړه‌ییزو سیاستونو او منفي ذهنیتونو نه دي وتلي، او همدا لامل دی چې د طالبانو اداره تر اوسه په رسمیت نه پېژندل کېږي

مجاهد په یوه مرکه کې له طلوع‌نیوز سره ادعا کړې، چې د لوېدیځو هېوادونو منفي لیدلوري او پخوانۍ پالیسۍ د دې سبب شوې، چې د طالبانو له ادارې سره عادي تعامل ونه شي. د هغه په وینا، نړیوال باور جوړول وخت ته اړتیا لري او دا بهیر ژر نه بشپړېږي

نوموړي وویل:

«لوېدیځ لا هم د جګړې د وخت له سیاستونو او ذهنیتونو نه دی تېر شوی. ځکه نو عادي تعامل وخت غواړي

له پاکستان سره د اړیکو په اړه

ذبیح‌الله مجاهد د پاکستان سره د روانو کړکېچونو په اړه هم خبرې وکړې او ټینګار یې وکړ، چې شته اختلافونه باید د خبرو اترو له لارې حل شي. هغه زیاته کړه، چې شخړې او فشارونه د دواړو لورو په ګټه نه دي او دیپلوماتیکه لاره تر ټولو مناسبه حل‌لاره ده

د نیوکو دوام

دا څرګندونې په داسې حال کې مطرح کېږي، چې د طالبانو د ادارې منتقدان د دوی کړنې د سختو نیوکو لاندې راولي. د بشري حقونو فعالان او سیاسي شنونکي وايي، چې د طالبانو د ادارې کارنامه د وګړو د بنسټیزو حقونو، فردي ازادیو، د ښځو او نجونو د حقونو، او سیاسي مشارکت په برخو کې له جدي پوښتنو سره مخ ده

منتقدان ټینګار کوي، چې یوازې څرګندونې د نړیوال تعامل لپاره بسنه نه کوي، بلکې عملي مسئولیت‌پذیري، د بشري حقونو درناوی، د قانون حاکمیت او ټول‌شموله سیاسي جوړښت د هر ډول دوامدار نړیوال تعامل بنسټیز شرطونه دي

نړیوال دریځ

نړیواله ټولنه بیا بیا ویلي، چې د طالبانو د ادارې په رسمیت پېژندل د مشخصو شرطونو پورې تړلی دی، چې پکې د ښځو د حقونو تأمین، د تعلیم او کار ازادي، د ترهګرۍ پر ضد څرګند دریځ، او د یو ټول‌شموله حکومت جوړول شامل دي

په داسې حال کې چې طالبان دا شرایط «سیاسي فشار» بولي، لوېدیځ هېوادونه ټینګار کوي، چې دا غوښتنې نړیوال اصول دي، نه د جګړې پاتې شوني سیاستونه