د افغانستان سفیر په جینوا کې طالبان «د فرهنګ وژونکي» وبلل

بریانیوز:( سه شنبه۲۳ جدی۱۴۰۴) په جینوا کې د افغانستان سفیر او د ملګرو ملتونو لپاره د دغه هېواد استازي، نصیر احمد اندیشه، طالبان د «فرهنګ وژونکي» بللي او ویلي یې دي چې دا ډله

د افغانستان د ګډ ملي هویت د زوال بهیر په بې‌ساري ډول چټکوي. نوموړي ټینګار کړی چې افغانستان د طالبانو تر واکمنۍ لاندې نه یوازې له سیاسي، بشري حقونو او بشردوستانه بحرانونو سره مخ دی، بلکې د یوه ژور هویتي او وجودي بحران پر لور روان دی

اندیشه په خپله وروستۍ لیکنه کې چې د ایکس (پخوانی ټویټر) پر ټولنیزه شبکه یې خپره کړې، ویلي:

یو ملت د نیزې او زور په مټ نه جوړېږي او نه هم ژوندي پاتې کېږي، بلکې هغه ماناوې، ارزښتونه او مفاهیم یې ساتي چې وګړي یې د ظلم، جبر او تبعیض پر وړاندې رامنځته کوي—هغه وګړي چې سر ټیټوي نه

د افغانستان سفیر زیاته کړې چې د طالبانو له واکمنۍ سره، افغانستان د داسې سیاستونو شاهد دی چې په سیستماتیک ډول د هېواد فرهنګي بنسټونه له منځه وړي او د خلکو ګډ هویت کمزوری کوي. د هغه په وینا، دا کړنې یوازې سیاسي نه دي، بلکې د یوه ملت پر روح او حافظه مستقیم برید دی

ګډ فرهنګ؛ د افغانستان د هویت ستن

نصیر احمد اندیشه ټینګار کړی چې د افغانستان ملي هویت د سیاست پر بنسټ نه، بلکې د ګډ فرهنګ پر بنسټ ولاړ دی. هغه ویلي چې د تاریخ په اوږدو کې، د افغانستان د حکومتدارۍ او ملت جوړونې ریښې په ګډو فرهنګي ارزښتونو کې نغښتې دي، نه په موقتي سیاسي جوړښتونو کې

د اندیشه په وینا، دا ګډ فرهنګ داسې ارزښتونه لري لکه مېلمه‌پالنه، شعر او ادبیات، موسیقي، کیسه‌وییل، د ښکلا درناوی، د نوروز نمانځنه، د جوماتونو او کلاګانو ځانګړې معمارۍ، او د اسلام یوه معتدله، انساني او زغم‌لرونکې تفسیر. هغه زیاته کړې چې همدغه ارزښتونه د پېړیو په اوږدو کې د افغانستان بېلابېل قومونه، ژبې او ټولنیزې ډلې سره نښلولي دي

د فرهنګي تنوع پر وړاندې منظم برید

د افغانستان سفیر خبرداری ورکړی چې طالبان د یوې واحدې او تحمیلي هویت د تپلو له لارې هڅه کوي د هېواد تاریخي فرهنګي، قومي او ژبنۍ تنوع له منځه یوسي. د هغه په اند، کله چې موسیقي چوپېږي، شعر سانسورېږي، ښځې له ټولنیز ژوند حذفېږي، دودونه ځپل کېږي او تاریخ تحریفېږي، نو په حقیقت کې یو ملت د ورو، خو خطرناک سقوط پر لور روانېږي

اندیشه دا وضعیت د افغانستان لپاره د اوږدمهاله بې‌ثباتۍ سرچینه بللې او ویلي یې دي چې که نړیواله ټولنه دا فرهنګي او هویتي بحران جدي ونه نیسي، نو افغانستان به یوازې له نړیوال نظام منزوي نه شي، بلکې خپل تاریخي ځان به هم له لاسه ورکړي

نړیوالو ته پیغام

د افغانستان دایمي استازي دا څرګندونې د نړیوالې ټولنې لپاره یو خبرداری بللی او ټینګار یې کړی چې د افغانستان قضیه یوازې د واک، سیاست او امنیت مسله نه ده، بلکې د یوه ملت د هویت، فرهنګ او راتلونکي د ژغورنې موضوع ده

شنونکي باور لري چې د اندیشه څرګندونې د افغان ډیپلوماتانو له لوري د نړیوال وجدان د راپارولو هڅه ده، څو نړۍ درک کړي چې په افغانستان کې روان بحران د نسلونو پر برخلیک اغېز لري، نه یوازې پر اوسني سیاسي وضعیت