چین په تندو ټکو د لاریجاني وژل کېدل وغندل؛ «د زور سیاست د منلو نه دی

چین په تندو ټکو د لاریجاني وژل کېدل وغندل؛ «د زور سیاست د منلو نه دی

بریانیوز( جمعه، ٢٩ حوت ١٤٠٤)

د نړۍ د قدرتونو ترمنځ د تاوتریخوالي په زیاتېدونکي چاپېریال کې، د چین بهرنیو چارو وزارت د ایران د ملي امنیت شورا د منشي علي لاریجاني وژل کېدل په کلکه غندلي او دا یې «د نړیوالو اصولو ښکاره سرغړونه» بللې ده. د چین د بهرنیو چارو وزارت ویاند لین جیان د یوې خبري ناستې پر مهال د اسرائیل او امريکا له لوري د ایراني چارواکو په نښه کولو او پر ملکي اهدافو د بریدونو په تړاو سخت غبرګون وښود

هغه په ټینګار سره وویل: «دا ډول کړنې په هېڅ صورت د منلو وړ نه دي. چین تل د زور او فشار پر ځای د خبرو، ثبات او متقابل درناوي پلوی پاتې شوی دی

 د هغه په وینا، نړیوال نظم باید د ځواک پر ځای د اصولو پر بنسټ ولاړ وي

د راپورونو له مخې، علي لاریجاني د دوشنبې په ورځ په یوه خونړي هوايي برید کې، چې ویل کېږي د اسرائیلو له لوري ترسره شوی، له خپل زوی او ساتونکي سره یو ځای ووژل شو—هغه پېښه چې د سیمې فضا یې لا پسې تاوده کړې ده

سیاسي شنونکي باور لري، د چین دا توند او روښانه دریځ یوازې یو عادي غبرګون نه دی، بلکې د نړیوالو سیالیو په ډګر کې د بیجینګ د رول څرګندونه هم کوي

د دوی په اند، دا ډول څرګندونې ښيي چې چین غواړي ځان د نړیوال ثبات او ډیپلوماسۍ د ملاتړي ځواک په توګه مطرح کړي

په ټوله کې، د لوړو پوړو چارواکو په نښه کېدل او د سترو قدرتونو دا ډول توند غبرګونونه د دې نښه ده چې سیمه د یو نوي او خطرناک پړاو پر لور روانه ده

پړاو چې هره پرېکړه پکې د پراخو پایلو درلودونکې کېدای شي