د افغانستان د سرپناه ژوره ناوریني ستونزه؛ میلیونونه وګړي د ژغورنې بېړنیو مرستو ته سترګې په لار

د افغانستان د سرپناه ژوره ناوریني ستونزه؛ میلیونونه وګړي د ژغورنې بېړنیو مرستو ته سترګې په لار

بریانیوز:( دوشنبه،۳۱ حمل۱۴۰۵) 

د  (د ملګرو ملتونو د استوګنې اداره) په خپل تازه راپور کې ویلي، چې په افغانستان کې شاوخوا ۴.۲ میلیونه وګړي په ۲۰۲۶ کال کې بېړني سرپناه او د ژوند لومړنیو اړینو توکو ته سخته اړتیا لري

دا شمېر نه یوازې د بشري وضعیت د خرابوالي څرګندونه کوي، بلکې دا هم ښيي چې د هېواد ډېری وګړي د ژوند له لومړنیو اسانتیاوو بې‌برخې پاتې دي

یاد بنسټ په خپله خبرپاڼه کې ټینګار کړی، چې په داسې حال کې چې په نړۍ کې د استوګنې پر مسئلو خبرې روانې دي، د افغان کورنیو لپاره د سرپناه اړتیا بېړنۍ او حیاتي بڼه غوره کړې ده. ویل کېږي، که سمدستي او عملي ګامونه وانخیستل شي، نو دا ستونزه به نوره هم ژوره او پراخه شي

د راپور له مخې، زرګونه کورنۍ د اوږدمهاله جګړو، بې‌وزلۍ، وچکالۍ، طبیعي پېښو او اقتصادي ستونزو له امله بې‌ ځایه شوې دي

ډېری دا کورنۍ اوس په لنډمهاله خېمو، نیمه ورانو کورونو او یا هم په داسې ځایونو کې ژوند کوي، چې د انساني ژوند له بنسټیزو معیارونو ډېر لېرې دي. د ژمي سړه هوا، د څښاک د پاکو اوبو نشتوالی، روغتیايي خدمتونو ته محدود لاسرسی او د کار نشتوالی، د دوی ورځنی ژوند له جدي ګواښونو سره مخ کړی دی

راپور زیاتوي، چې په ځانګړې توګه ښځې، ماشومان او زاړه کسان د دې وضعیت تر ټولو ډېر اغېزمن شوي دي. ماشومان له زده‌کړو پاتې کېږي، ناروغۍ ډېرېږي او کورنۍ له رواني فشارونو سره مخ کېږي

دا حالت د ټولنې پر راتلونکې ژور اغېز کولای شي

یاد بنسټ له مرستندویو هېوادونو، خیریه بنسټونو او نړیوالو ادارو غوښتنه کړې، چې خپلې مرستې زیاتې کړي او د بېړنیو سرپناه پروګرامونو ته لومړیتوب ورکړي. همدارنګه یې ټینګار کړی، چې باید د اوږدمهاله حللارو لپاره هم کار وشي، څو خلک له موقتي حالت څخه دایمي او خوندي استوګنځایونو ته ولېږدول شي

کارپوهان باور لري، که دا ناورین پر وخت مدیریت نه شي، نو د بې‌ وزلۍ کچه به لوړه شي، ناروغۍ به ډېرې شي او ټولنیزې ستونزې به لا پسې زیاتې شي. خو که پر وخت او همغږي هڅې ترسره شي، نو لا هم شونې ده

چې د میلیونونو انسانانو ژوند وژغورل شي او د هغوی لپاره د عزت وړ ژوند برابر شي