عراقچي امریکا ته خبرداری ورکړ؛ د ایران پر ضد جګړه به د امریکا اقتصاد له سخت بحران سره مخ کړي

عراقچي امریکا ته خبرداری ورکړ؛ د ایران پر ضد جګړه به د امریکا اقتصاد له سخت بحران سره مخ کړي

بریا نیوز (شنبه ،۲۶ثور ۱۴۰۵)

د ایران د بهرنیو چارو وزیر، سید عباس عراقچي، امریکا ته د احتمالي جګړې د درنو اقتصادي پایلو په اړه سخت خبرداری ورکړی او ویلي یې دي چې واشنګټن باید د «اختیاري جګړې» درانه لګښتونه پر خپلو اوږو یوسي

عراقچي ویلي، که د ایران پر ضد جګړه پراخه شي، نو یوازې به د سیمې امنیت نه ګډوډېږي، بلکې د امریکا اقتصاد به هم له سختو فشارونو سره مخامخ شي. د هغه په وینا، د تېلو د بیو لوړوالی، د ونډو بازارونو بې‌ثباتي او د مالي نظام کمزوري کېدل هغه خطرونه دي چې امریکا ته به درانه زیانونه ورسوي

هغه زیاته کړې چې د پورونو او د کورونو د ګروي سودونو زیاتوالی به د امریکايي کورنیو اقتصادي ستونزې نورې هم ژورې کړي. د ایران د بهرنیو چارو وزیر ټینګار کړی چې د موټر پورونو نه‌ورکول اوس د تېرو څه باندې دېرشو کلونو تر ټولو لوړې کچې ته رسېدلي او دا د امریکا د اقتصادي وضعیت د خرابېدو ښکاره نښه ده

عراقچي ویلي، دا ټول وضعیت د مخنیوي وړ و او که سیاسي مشران د جګړې پر ځای د ډیپلوماسۍ او خبرو اترو لاره خپله کړي وای، نړۍ به د داسې خطرناک اقتصادي او امنیتي بحران پر لور نه تلله

تر دې وړاندې هم یو شمېر امریکايي چارواکو، اقتصادپوهانو او شنونکو اندېښنه څرګنده کړې وه چې هره نوې جګړه به د امریکا پر مالي نظام، نړیوالو بازارونو او د خلکو پر ورځني ژوند ژور منفي اغېز وکړي. شنونکي باور لري چې د منځني ختیځ هر ډول پراخ کړکېچ کولای شي نړیوال اقتصاد له بې‌ثباتۍ، د انرژۍ له بحران او د پانګوالو له وېرې سره مخ کړي

په همدې حال کې نړیوال بازارونه د سیمې د روان وضعیت بدلونونو ته په بې‌صبرۍ ګوري، ځکه د ایران او امریکا ترمنځ هر ډول پوځي ترینګلتیا نه یوازې سیاسي، بلکې اقتصادي زلزله هم رامنځته کولای شي