د اوربند تر سیوري لاندې وینه تویېدنه؛ د لبنان په سویل کې د اسراییلي بریدونو له امله۶تنه وژل شوي

د اوربند تر سیوري لاندې وینه تویېدنه؛ د لبنان په سویل کې د اسراییلي بریدونو له امله ۶ تنه وژل شوي

بریا نیوز (شنبه ،۲۶ثور ۱۴۰۵)

د لبنان په سویل کې د اسراییل په تازه هوايي بریدونو کې لږ تر لږه ۶ تنه وژل شوي او ۲۲ نور ټپیان دي

راپورونه وایي، په وژل شویو کسانو کې درې مرستندویان هم شامل دي چې په یوه ملکي دفاعي مرکز کې یې د ژغورنې چارې ترسره کولې

ځایي سرچینو ویلي، بریدونه پر هغو سیمو ترسره شوي چې ملکي وګړي او د بیړنیو مرستو کارکوونکي پکې موجود وو. د ټپیانو شمېر هم د زیاتېدو احتمال لري، ځکه یو شمېر کسان لا هم تر خاورو او ویجاړو ودانیو لاندې بند پاتې دي

دغه خونړی برید په داسې وخت کې ترسره کېږي چې د امریکا د بهرنیو چارو وزارت تازه اعلان کړی، لبنان او اسراییل د ۴۵ ورځو لپاره اوربند غځولی دی. د اوربند د غځېدو موخه د جګړې د پراخېدو مخنیوی او د سیمې د تاوتریخوالي کمول بلل شوي وو، خو وروستیو بریدونو یو ځل بیا د دغه اوربند پر راتلونکي پوښتنې راولاړې کړې دي

سیاسي شنونکي وایي، که څه هم د اوربند غځول د سولې لپاره یو مهم ګام ګڼل کېده، خو د بریدونو دوام ښيي چې سیمه لا هم د خطرناک کړکېچ په درشل کې ولاړه ده. د دوی په باور، د ملکي وګړو او مرستندویانو په نښه کېدل به نړیوال غبرګونونه لا توند کړي

په همدې حال کې بشري مرستندویه ادارو د لبنان د خرابېدونکي وضعیت په اړه اندېښنه څرګنده کړې او ویلي یې دي چې روانې جګړې زرګونه کورنۍ له سخت بشري ناورین سره مخ کړې دي. نړیواله ټولنه د جګړې د سمدستي بندېدو او د ملکي وګړو د خوندیتوب غوښتنه کوي