مقاله

اروپایي ټولنې له افغانستان او پاکستان د زغم او خبرو اترو غوښتنه وکړه

اشتراک گذاری:

بریانیوز( سه شنبه، ۱۲ جوزا ١٤٠٥)

اروپایي ټولنې له افغانستان او پاکستان غوښتي چې د روانو ترینګلتیاوو پر مهال له زغم او احتیاط څخه کار واخلي او د شته اختلافاتو د هواري لپاره د خبرو اترو او ډیپلوماټیکو لارو چارو ته مخه کړي

اروپایي ټولنې په خپلې اعلامیه کې ټینګار کړی چې د دښمنیو او تاوتریخوالي دوام نه یوازې د دواړو هېوادونو ترمنځ اړیکې زیانمنوي، بلکې بشري وضعیت هم لا پسې کړکېچنوي او په ټوله سیمه کې د بې‌ثباتۍ د پراخېدو خطر زیاتوي

اعلامیه زیاتوي چې سیمه‌ییز ثبات، متقابل درناوی او رغنده خبرې اترې د شخړو د حل تر ټولو اغېزمنه لاره ده او ټول لوري باید د وضعیت د لا خرابېدو مخه ونیسي

اروپایي ټولنې همدارنګه د هغو هڅو ملاتړ څرګند کړی چې د اختلافاتو د کمېدو، د باور د فضا د رامنځته کېدو او د سیمې د امنیت د پیاوړتیا لپاره ترسره کېږي

دا غوښتنه په داسې مهال مطرح کېږي چې د افغانستان او پاکستان ترمنځ د یو شمېر سیاسي او امنیتي مسایلو له امله اندېښنې زیاتې شوې دي او نړیوالې کړۍ د دواړو ګاونډیو هېوادونو ترمنځ د اړیکو د عادي کېدو غوښتنه کوي

شنونکي باور لري چې د خبرو اترو دوام او د متقابل تفاهم پیاوړتیا کولی شي د سیمې د ثبات، اقتصادي ودې او د ولسونو د هوساینې لپاره مثبتې پایلې ولري