سرچینې: د افغانستان د پخوانیو چارواکو یو پلاوی د پاکستان له پوځي او امنیتي چارواکو سره د لیدنو لپاره اسلام‌اباد ته تللی

د باخبرو سرچینو د معلوماتو له مخې، د افغانستان د پخوانیو چارواکو او د ولسي جرګې د یو شمېر پخوانیو غړو یو پلاوی د پاکستان له پوځي او امنیتي چارواکو سره د لیدنو او خبرو لپاره اسلام‌اباد ته سفر کړی دی.

بریانیوز- پنجشنبه ١٥ اسد ١٤٠٥

سرچینو د پنجشنبې په ورځ، د اسد په ۱۵مه، ویلي چې د دغه پلاوي غړي پرون اسلام‌اباد ته رسېدلي او ټاکل شوې ده چې د خپل سفر پر مهال د پاکستان له لوړپوړو پوځي او امنیتي چارواکو سره وګوري.

د سرچینو په وینا، په دې پلاوي کې د صنعت او سوداګرۍ پخوانی وزیر نثار احمد فیضي غوریاني، د ولسي جرګې د کورنیو چارو د کمېسیون پخوانی رئیس محمد الماس زاهد، د کاپیسا د خلکو پخوانی استازی محمد اقبال صافي، د تخار پخوانی استازی او د جوزجان پخوانی والي محمدعالم ساعي، د ولسي جرګې پخوانی رئیس عبدالرؤوف ابراهیمي او الیاس غوریاني شامل دي.

سرچینې زیاتوي چې د دې سفر اصلي موخه د افغانستان د وضعیت، د پاکستان او افغانستان د اړیکو، او د طالبانو د مخالفو جریانونو د فعالیتونو او احتمالي مقاومت په اړه له پاکستاني چارواکو سره سلا مشورې دي.

د غونډو له جزییاتو خبر یوې بلې سرچینې ویلي چې د لیدنو پر مهال د طالبانو د مخالفو ډلو د فعالیتونو او د هغوی د لا زیاتې همغږۍ په اړه هم خبرې شوې دي. د سرچینې په ادعا، د بحث یوه مهمه موضوع د طالبانو د مخالفو جریانونو ترمنځ د همغږۍ پیاوړتیا وه.

سرچینې همداراز ویلي چې ګډونوالو د داعش، القاعده او تحریک طالبان پاکستان (TTP) له ګواښونو سره د تړلو موضوعاتو په اړه هم نظرونه تبادله کړي دي.

د سرچینې په وینا، په دغو غونډو کې دوه امریکایي وګړي هم حضور درلود، خو تر اوسه د هغوی هویت، رول او احتمالي دریځ نه دی روښانه شوی.

د پاکستان د بهرنیو چارو وزارت تر اوسه د دې راپور په اړه کوم رسمي غبرګون نه دی ښودلی.