اخبار جهان

روسیه: د افغانستان وضعیت لا هم د ګډ امنیتي تړون سازمان له مهمو لومړیتوبونو څخه دی

اشتراک گذاری:

بریانیوز/ جمعه( ۱۶ / اسد /۱۴۰۵هـ.ش)

مسکو – د ګډ امنیتي تړون سازمان کې د روسیې دایمي استازي، ولادیمیر واسیلیف، ویلي چې د افغانستان امنیتي وضعیت لا هم د دې سازمان د غړو هېوادونو د بحثونو له مهمو موضوعاتو څخه دی او د افغانستان اړوند پرمختګونه په دوامداره توګه څارل کېږي

واسیلیف ویلي، د دې سازمان تر ټولو لویه اندېښنه د تاجکستان او افغانستان پر ګډه پوله متمرکزه ده، ځکه د سیمې امنیت د غړو هېوادونو لپاره ځانګړی اهمیت لري

د هغه په وینا، د تاجکستان او افغانستان د پولې د پیاوړتیا لپاره د ګډ پروګرام عملي کېدل پیل شوي او د سازمان غړي هېوادونه د تاجکستان د سرحدي ځواکونو اړتیاوې ارزوي، څو د اړتیا وړ تجهیزاتو او امکاناتو د برابرولو په اړه پرېکړې وکړي

د ګډ امنیتي تړون سازمان، چې روسیه، تاجکستان، قزاقستان، قرغزستان، ارمنستان او بلاروس یې غړي دي، تر دې وړاندې هم د افغانستان د امنیتي وضعیت او د سرحدونو د خوندیتوب په اړه خپلې اندېښنې څرګندې کړې دي