مقاله

پزشکیان: د امریکا د بندیزونو له امله د ایران سوداګري ۳۵ سلنه کمه شوې

اشتراک گذاری:

بریانیوز دوشنبه ( ۹/ سنبله /۱۴۰۵هـ.ش)

تهران — د ایران ولسمشر مسعود پزشکیان وايي، د امریکا د بندیزونو او د ایران د سمندري بندرونو د محاصرې له امله د دغه هېواد صادرات او واردات له پام وړ کمښت سره مخ شوي دي

پزشکیان ویلي، د بندیزونو او سمندري محدودیتونو له امله د ایران بهرنۍ سوداګري د ۲۵ تر ۳۵ سلنې پورې کمه شوې، چې د نوموړي په وینا، د اقتصاد لپاره د پام وړ فشار رامنځته کوي

د ایران ولسمشر خبرداری ورکړی چې د سوداګرۍ د لارو محدودېدل د وارداتي توکو د لېږد لګښتونه لوړوي او په پایله کې د توکو پر بیو هم اغېز کولی شي

نوموړي ویلي، د صادراتو کموالی د وارداتو په پرتله لږ دی، خو د وارداتو د پام وړ کمېدو له امله د ایران اقتصادي فعالیتونه له جدي فشار سره مخ شوي دي

د پزشکیان څرګندونې په داسې حال کې دي چې د امریکا او ایران ترمنځ اقتصادي او پوځي کړکېچ لا هم دوام لري او واشنګټن هڅه کوي د بندیزونو او مالي فشارونو له لارې پر تهران فشار زیات کړي

ایراني چارواکي بیا ټینګار کوي چې د امریکا له فشارونو سره سره به د هېواد اقتصادي فعالیتونه او د تېلو صادراتو ته د لارو موندلو هڅې دوام ولري