صحّت

افغانستان: لښکرګاه کې د ۲۰۰ بستریز روغتون د جوړېدو طرحه منظوره شوه

اشتراک گذاری:

بریانیوز دوشنبه ( ۹/ سنبله /۱۴۰۵هـ.ش)

لښکرګاه — د طالبانو د ریاست‌الوزرا اقتصادي معاونیت وايي، د هلمند ولایت په مرکز لښکرګاه کې د ۲۰۰ بستریز روغتون د جوړېدو طرحه د تدارکاتو کمېسیون په وروستۍ غونډه کې منظوره شوې ده

د اقتصادي معاونیت د معلوماتو له مخې، دغه روغتون به د ۱۲ زره متره مربع ځمکې پر مخ جوړ شي او د جوړولو چارې به یې په دوو کلونو کې بشپړې شي. د پروژې ټول لګښت ۲۱۴ میلیونه افغانۍ اټکل شوی دی

چارواکي وايي، د روغتون له جوړېدو سره به د هلمند اوسېدونکو ته د روغتیايي خدمتونو د وړاندې کولو ظرفیت زیات شي او ناروغان به د تخصصي درملنې لپاره له ولایت څخه بهر د سفر اړتیا کمه ولري

د پلان له مخې، په دغه روغتون کې به د بېړنیو پېښو ترڅنګ د داخله، جراحي، ارتوپیدي، سترګو، رواني او عصبي، ماشومانو او نسایي ـ ولادي ناروغیو لپاره روغتیايي خدمتونه وړاندې کېږي

د هلمند روغتیايي وضعیت ته په کتو، د دغه روغتون جوړېدل د ولایت د روغتیايي بنسټونو د پراختیا له مهمو پروژو څخه بلل کېږي. د چارواکو په وینا، د پروژې عملي چارې به له منظورۍ وروسته پیل او د ټاکل شوي مهال‌وېش له مخې به په دوو کلونو کې بشپړې شي