اخبار جهان

نيويارک: د امریکا د پوځ وزیر ډان ډریسکول استعفا وړاندې کړې

اشتراک گذاری:

بریانیوز سه شنبه ( ۱۰/ سنبله /۱۴۰۵هـ.ش)

د امریکا د پوځ وزیر ډان ډریسکول د ولسمشر ډونالډ ټرمپ ادارې ته خپله استعفا وړاندې کړې ده. د راپورونو له مخې، دا پرېکړه د نوموړي او د دفاع وزیر پیټ هګسټ ترمنځ د میاشتو اوږدو اختلافونو وروسته شوې ده

د راپورونو له مخې، د ډریسکول استعفا تر اوسه په رسمي ډول نه ده منل شوې، خو تمه ده چې نوموړی په راتلونکو څو ورځو کې پنټاګون پرېږدي. سپینې ماڼۍ بیا د ډریسکول د کار ستاینه کړې او هغه یې د ټرمپ د اجنډا په پلي کولو، د پوځ د چمتووالي په لوړولو او د روسیې او اوکراین ترمنځ د خبرو په برخه کې اغېزناک بللی دی

د ډریسکول او هګسټ ترمنځ اختلافات تر ډېره د امریکا د پوځ د راتلونکې تګلارې، د لوړپوړو پوځي چارواکو د ګوښه کولو او د ځینو افسرانو د ترفیع پر موضوعاتو راڅرخېدل. د دغو اختلافونو له ډلې د پوځ د لوی درستیز جنرال رینډي جورج د له دندې لرې کولو پرېکړه هم د دواړو ترمنځ اړیکې لا ترینګلې کړې وه

ډریسکول چې په ۲۰۲۵ کال کې د امریکا د پوځ د وزیر په توګه دنده پیل کړې وه، د امریکا په تاریخ کې د پوځ تر ټولو ځوان وزیر بلل کېده. نوموړي د پوځ د عصري کولو، بې‌پیلوټه الوتکو د پراختیا او د نوې پوځي ټکنالوژۍ د کارولو ملاتړ کړی و

هغه د روسیې او اوکراین د جګړې د پای ته رسولو په هڅو کې هم د واشنګټن د یوه مهم استازي په توګه رول درلود او له اوکرایني چارواکو سره یې د سولې د احتمالي هوکړې په اړه خبرې کړې وې

د ډریسکول استعفا په داسې وخت کې کېږي چې د امریکا په دفاعي ادارو کې د لوړپوړو چارواکو د بدلونونو لړۍ روانه ده او د پوځ د مشرتابه په جوړښت کې وروستیو بدلونونو په واشنګټن کې د پوځي تګلارې او د پنټاګون د رهبرۍ په اړه بحثونه زیات کړي دي