ملګري ملتونه: د ښځینه روغتیايي کارکوونکو محدودېدل د افغان ښځو روغتیا له ګواښ سره مخ کوي

ملګري ملتونه: د ښځینه روغتیايي کارکوونکو محدودېدل د افغان ښځو روغتیا له ګواښ سره مخ کوي

 بریانیوز چهار شنبه ( ۱۱/ سنبله /۱۴۰۵هـ.ش)

کابل — د ملګرو ملتونو د ښځو څانګه وايي، په افغانستان کې د ښځو پر زده‌کړو او کار د لګېدلو محدودیتونو له امله د ښځینه ډاکټرانو، قابلو او نورو روغتیايي کارکوونکو فعالیت او روزنه له جدي ستونزو سره مخ شوې ده

دغه بنسټ ټینګار کوي چې افغان ښځې روغتیايي خدمتونو ته د لاسرسي حق لري او د ښځینه روغتیايي کارکوونکو شتون، په ځانګړي ډول د میندو او ماشومانو لپاره، اړین دی

د ملګرو ملتونو د ښځو په وینا، د ښځینه روغتیايي کارکوونکو کمښت کولی شي هغو ښځو ته د درملنې لاسرسی لا ستونزمن کړي چې د ټولنیزو او کلتوري شرایطو له امله له نارینه روغتیايي کارکوونکو څخه د درملنې اخیستل ورته ستونزمن وي

بلخوا، د ملګرو ملتونو د ماشومانو وجهي صندوق، یونیسف، په یوه تازه ارزونه کې خبرداری ورکړی چې که پر نجونو د زده‌کړو او پر ښځو د کار محدودیتونه دوام وکړي، افغانستان ښايي تر ۲۰۳۰ کال پورې شاوخوا ۵۴۰۰ ښځینه روغتیايي کارکوونکي له لاسه ورکړي. د ښځینه ښوونکو په ګډون د له لاسه تلونکو مسلکي ښځو شمېر تر ۲۵ زرو ډېر اټکل شوی دی

یونیسف وايي، د ښځینه روغتیايي کارکوونکو کمېدل به د ښځو او ماشومانو پر روغتیايي خدمتونو مستقیم اغېز ولري او په ځانګړي ډول د میندو، نویو زېږېدلو ماشومانو او نورو ښځینه ناروغانو د درملنې بهیر به له ستونزو سره مخ کړي

د ښځو د زده‌کړو او کار د محدودیتونو دوام په داسې حال کې دی چې افغانستان لا دمخه د مسلکي روغتیايي کارکوونکو له کمښت سره مخ دی. ملګري ملتونه خبرداری ورکوي چې د ښځینه متخصصانو د روزنې بهیر کمزوری کېدل به په راتلونکو کلونو کې د هېواد روغتیايي نظام پر وړاندې ستونزې لا زیاتې کړي

په همدې حال کې، په ټولنیزو رسنیو کې یو شمېر کاروونکو د ښځینه روغتیايي کارکوونکو د کمښت او د میندو د روغتیايي ستونزو د زیاتېدو په اړه د طالبانو پر مشر هبت‌الله اخوندزاده نیوکې کړې دي؛ خو د دغو کاروونکو ادعاوې د مړینې د کچې د مستقیم مسؤلیت د ثابتولو لپاره له خپلواکو شواهدو سره نه دي تایید شوې