واشنګټن: له طالبانو سره د کانونو اقتصادي تعامل به د هغوی جیبونه پیاوړي کړي

اشتراک گذاری:

د امریکا د بهرنیو چارو وزارت یوه ویاند د امریکا غږ ته په استول شوي بیان کې طالبان د «ځانګړې نړیوالې ترهګرې ډلې» په توګه یاد کړي او ویلي یې دي چې له طالبانو سره په کانونو او منرالونو کې اقتصادي تعامل به د افغانانو پر وړاندې د دې ډلې د سخت‌دریځو سیاستونو د دوام زمینه برابره کړي.

بریانیوز- چهارشنبه ١١ سنبله ١٤٠٥

د امریکا د بهرنیو چارو وزارت ویلي: «په کانونو او منرالونو کې تعامل به یوازې د طالبانو لاسونو ته پیسې ور ورسوي او د افغانانو په وړاندې د هغوی د سخت‌دریځي چلند د دوام لپاره به لاره هواره کړي.»

دا څرګندونې وروسته له هغې کېږي چې د طالبانو د بهرنیو چارو وزیر، امیرخان متقي، له «فایننشال ټایمز» ورځپاڼې سره په مرکه کې له واشنګټن څخه وغوښتل چې په افغانستان کې د کانونو، زیربناوو، کرنې او سوداګرۍ په برخو کې پانګونه وکړي.

د طالبانو ویاند ذبیح‌الله مجاهد هم په کابل کې خبریالانو ته ویلي چې طالبان له امریکا سره د «ښو دیپلوماتیکو او اقتصادي اړیکو» غوښتونکي دي.

خو واشنګټن تر اوسه د طالبانو تر واک لاندې افغانستان کې د کانونو او منرالونو په برخه کې د پانګونې لېوالتیا نه ده ښودلې.

طالبان د ۲۰۲۱ کال د اګست له واکمنېدو راهیسې د امریکا او نړیوالې ټولنې له لوري په رسمیت نه دي پېژندل شوي. نړیواله ټولنه له طالبانو غواړي چې د ښځو او نجونو د حقونو په ګډون بشري حقونو ته درناوی وکړي او د افغانستان لپاره یو ټولګډونه حکومت رامنځته کړي.