سیاست

شي جین‌پینګ: چین د افغانستان، اوکراین او منځني ختیځ د شخړو د حل لپاره هڅې زیاتوي

اشتراک گذاری:

بریانیوز پنجشنبه ( ۱۲/ سنبله /۱۴۰۵هـ.ش)

بیشکک — د چین ولسمشر شي جین‌پینګ وايي، هېواد یې چمتو دی چې د افغانستان، اوکراین او منځني ختیځ د شخړو د حل لپاره خپلې ډیپلوماټیکې هڅې پیاوړې کړي

شي جین‌پینګ دا څرګندونې د شانګهای همکاریو سازمان په غونډه کې کړې او ټینګار یې کړی چې د شخړو د هواري لپاره باید ډیپلوماټیکو هڅو او څو اړخیزې همکارۍ ته لا ډېر اهمیت ورکړل شي

نوموړي په نړیواله کچه د امنیت او حکومتولۍ په برخو کې د هېوادونو ترمنځ د لا زیاتو همکاریو غوښتنه کړې او ویلي یې دي چې نړیوالې ستونزې د یوه هېواد له لوري په یوازې ځان نه شي حل کېدای

د چین ولسمشر په داسې حال کې د افغانستان د شخړو د سیاسي حل لپاره د خپل هېواد د هڅو د پیاوړتیا خبره کوي چې افغانستان لا هم له امنیتي، اقتصادي او بشري ننګونو سره مخ دی او د سیمې هېوادونه د دغه هېواد د ثبات په اړه اندېښنې لري

چین تر دې وړاندې هم د افغانستان په اړه د سیمه‌ییزو همکاریو او سیاسي حل پر اړتیا ټینګار کړی او د کابل او سیمې د هېوادونو ترمنځ د اړیکو د پراختیا ملاتړ یې کړی دی