مقاله

اسلام‌آباد: د طالبانو د ګډو کمېټو وړاندیز مو په پام کې نیولی

اشتراک گذاری:

بریانیوز پنجشنبه ( ۱۲/ سنبله /۱۴۰۵هـ.ش)

د پاکستان د بهرنیو چارو وزارت ویاند طاهر اندرابي وايي، اسلام‌اباد د طالبانو د کورنیو چارو وزیر سراج‌الدین حقاني هغه وړاندیز په پام کې نیولی چې د دواړو لورو ترمنځ د ستونزو د هواري لپاره دې ګډې کمېټې جوړې شي

اندرابي ټینګار کړی چې د هرې تګلارې دوام یوازې په ژمنو نه، بلکې په عملي اقداماتو پورې تړلی دی. نوموړي ویلي، طالبان باید ډاډ ورکړي چې د افغانستان خاوره د پاکستان پر ضد د ترهګریزو فعالیتونو لپاره نه کارول کېږي

د پاکستان د بهرنیو چارو وزارت ویاند زیاته کړې چې طالبان باید د دوحې د تړون په ګډون خپلې ټولې کړې ژمنې عملي کړي او د تحریک طالبان پاکستان یا ټي‌ټي‌پي د فعالیتونو مخه ونیسي

اسلام‌اباد له اوږدې مودې راهیسې ادعا کوي چې د ټي‌ټي‌پي وسله‌وال په افغانستان کې خوندي ځایونه لري او له هغه ځایه د پاکستان پر ضد بریدونه تنظیموي؛ خو د طالبانو حکومت دا ادعا رد کړې او ټینګار یې کړی چې د پاکستان امنیتي ستونزه د دغه هېواد داخلي مسئله ده

د ګډو کمېټو د جوړولو وړاندیز په داسې حال کې مطرح کېږي چې د کابل او اسلام‌اباد ترمنځ د امنیتي اندېښنو، سرحدي شخړو او د ټي‌ټي‌پي د فعالیتونو پر سر اړیکې له جدي ترینګلتیا سره مخ دي