اخبار جهان

د بهرنیو چارو وزیر امیرخان متقي: له سیمه‌ییزو او اروپايي هېوادونو سره د طالبانو اړیکې پراخې شوې دي

اشتراک گذاری:

بریانیوز پنجشنبه ( ۱۲/ سنبله /۱۴۰۵هـ.ش)

کابل — د طالبانو د بهرنیو چارو وزیر امیرخان متقي وايي، له سیمه‌ییزو هېوادونو سره د طالبانو اړیکې په سیاسي، اقتصادي او نورو برخو کې د پام وړ پرمختګ کړی او له اروپايي هېوادونو سره هم د اړیکو د پراختیا بهیر روان دی

متقي ویلي، طالبان هڅه کوي له بېلابېلو هېوادونو سره سیاسي او اقتصادي اړیکې پیاوړې کړي او د افغانستان لپاره د سیمه‌ییزو او نړیوالو همکاریو زمینه پراخه کړي

نوموړي د ښځو او نجونو د وضعیت په اړه هم ویلي چې ښځې د سوداګرۍ په برخه کې فعالیت لري او نجونې په ښوونځیو کې تر شپږم ټولګي پورې زده‌کړې کوي

د طالبانو د بهرنیو چارو وزیر ادعا کړې چې اوس مهال په افغانستان کې له درې میلیونو ډېرې نجونې په ښوونځیو کې پر زده‌کړو بوختې دي

د متقي څرګندونې په داسې حال کې دي چې د نجونو د زده‌کړو او د ښځو د کار پر محدودیتونو نړیوالې نیوکې دوام لري. ملګري ملتونه او د بشري حقونو یو شمېر بنسټونه له طالبانو غوښتي چې د ښځو او نجونو پر زده‌کړو او کار لګېدلي محدودیتونه لرې کړي

طالبان بیا وايي، د ښځو او نجونو په اړه یې تګلارې د اسلامي شریعت له اصولو سره سمې دي او په افغانستان کې د ښځو د حقونو د تأمین لپاره لازم اقدامات ترسره کېږي