اخبار جهان

اروپايي ټولنې : افغانستان ته د خوړو او معیشت لپاره ۱۷.۴ میلیونه ډالره مرسته اعلان کړه

اشتراک گذاری:

بریانیوز پنجشنبه ( ۱۲/ سنبله /۱۴۰۵هـ.ش)

کابل — اروپايي ټولنې په افغانستان کې د خوړو د روان بحران او د اقلیمي بدلونونو د اغېزو د کمولو لپاره د ملګرو ملتونو د خوړو له نړۍوال پروګرام سره د ۱۷.۴ میلیونه ډالرو نوې مرستې اعلان کړې ده

د معلوماتو له مخې، دغه مرسته به د یوه کال په موده کې د وچکالۍ او خوړو له کمښت سره د مخ کلیوالو کورنیو د معیشت د پیاوړتیا او د ښوونځیو د خوړو د پروګرامونو لپاره ولګول شي

د افغانستان لپاره د اروپايي ټولنې د همکارۍ مشر ایریک بوم ویلي، د دې مرستې موخه د خلکو د خوړو کیفیت ښه کول او د زیان‌منو کلیوالو کورنیو د عاید سرچینو ساتنه ده

نوموړي ټینګار کړی چې د خوړو د بحران د اغېزو د کمولو ترڅنګ باید د هغو کورنیو د اقتصادي مقاومت لپاره هم زمینه برابره شي چې د وچکالۍ او نورو اقلیمي ستونزو له امله یې د ژوند سرچینې زیانمنې شوې دي

بلخوا، د ملګرو ملتونو د خوړو نړۍوال پروګرام وايي، په افغانستان کې شاوخوا ۱۷.۴ میلیونه کسان بېړنیو خوراکي مرستو ته اړتیا لري

دغه پروګرام خبرداری ورکوي چې وچکالي، بې‌وزلي او د خلکو د عاید سرچینو کمزوري کېدل د افغانستان د خوړو ناامني لا پسې زیاتوي او د زیان‌منو کورنیو د ملاتړ لپاره دوامدارو نړیوالو مرستو ته اړتیا ده