سیاست

هنګري: اوکراین لا هم د اروپايي ټولنې غړیتوب ته چمتو نه دی

اشتراک گذاری:

بریانیوز جمعه ( ۱۳/ سنبله /۱۴۰۵هـ.ش)

بوداپست — د هنګري لومړي وزیر پیتر مګیار ویلي، اوکراین لا هم د اروپايي ټولنې د غړیتوب لپاره لازم شرایط نه دي پوره کړي او د دې هېواد د غړیتوب په اړه باید له بېړنۍ پرېکړې ډډه وشي

مګیار ویلي، اوکراین اوس هم د جګړې په حالت کې دی او له هنګري سره یې د ټرانسکارپاتیا سیمې د هنګري‌تبار اقلیت د حقونو د بېرته اعاده کولو په اړه کړې هوکړه په بشپړه توګه نه ده عملي کړې

نوموړي ټینګار کړی چې د اوکراین د اروپايي ټولنې د غړیتوب ارزونه باید یوازې د دغه هېواد د ترسره شویو اصلاحاتو، لاسته راوړنو او د غړیتوب د شرایطو د پوره کولو پر بنسټ ترسره شي

د هنګري لومړي وزیر زیاته کړې چې د اوکراین د غړیتوب د بهیر له بشپړېدو وروسته به د دې موضوع په اړه وروستۍ پرېکړه په هنګري کې د ټول‌پوښتنې له لارې ترسره شي

اوکراین له ۲۰۲۲ کال راهیسې د اروپايي ټولنې د غړیتوب لپاره رسمي نوماند دی او د غړیتوب د خبرو بهیر یې هم پیل کړی، خو د دې بهیر د بشپړېدو لپاره د قانوني، اقتصادي او اداري اصلاحاتو ګڼ شرایط باید پوره کړي

د اوکراین د اروپايي ټولنې غړیتوب د هنګري او یو شمېر نورو غړو هېوادونو ترمنځ له اختلافاتو سره مخ دی. بوداپست په ځانګړي ډول د اوکراین د هنګري‌تبار اقلیت د حقونو موضوع د غړیتوب له بحث سره تړلې بولي