بردي‌محمدوف: د ټاپي پروژې له بشپړېدو سره به په افغانستان کې زرګونه کاري فرصتونه رامنځته شي

بردي‌محمدوف: د ټاپي پروژې له بشپړېدو سره به په افغانستان کې زرګونه کاري فرصتونه رامنځته شي

 بریانیوز جمعه ( ۱۳/ سنبله /۱۴۰۵هـ.ش)

هرات — د ترکمنستان ملي مشر قربانقلي بردي‌محمدوف وايي، د ترکمنستان ـ افغانستان ـ پاکستان ـ هند (ټاپي) ګازو نل‌لیکې د پلي کېدو په بهیر کې به یوازې په افغانستان کې له ۱۲ زرو ډېر کاري فرصتونه رامنځته شي

بردي‌محمدوف ویلي، ټاپي یوه ستره سیمه‌ییزه پروژه ده چې د جوړېدو چارې یې روانې دي او له بشپړېدو وروسته به د څو لسیزو لپاره د سیمې د نږدې دوه میلیارده نفوس لرونکو هېوادونو د انرژۍ اړتیاوو په پوره کولو کې مهم رول ولوبوي

د ترکمنستان د ملي مشر په وینا، د دغه هېواد د انرژۍ تګلاره د ګازو د تولیدوونکو، مصرفوونکو او ترانزیټي هېوادونو د ګټو پر متوازن خوندیتوب ولاړه ده. نوموړي ټینګار کړی چې ټاپي یوازې د انرژۍ پروژه نه ده، بلکې د سیمې د اقتصادي اړیکو او همکاریو د پراختیا لپاره هم مهمه ده

ټاپي نږدې ۱۸۰۰ کیلومتره اوږد ګاز نل‌لیکه ده چې ترکمنستان د افغانستان له لارې له پاکستان او هند سره نښلوي. د افغانستان د کانونو او پټرولیم وزارت د معلوماتو له مخې، د دې نل‌لیکې شاوخوا ۸۱۶ کیلومتره برخه د افغانستان له خاورې تېرېږي او پروژه د کال شاوخوا ۳۳ میلیارد متر مکعب ترکمن ګاز لېږدولو لپاره طرحه شوې ده

د ټاپي د افغانستان په برخه کې د جوړولو چارې په وروستیو میاشتو کې چټکې شوې دي. د افغان حکومت د معلوماتو له مخې، د هرات په برخه کې د پروژې د پرمختګ لپاره له ترکمنستان سره د پاتې تخنیکي او حقوقي موضوعاتو د هواري هڅې هم روانې دي

د دې پروژې له بشپړېدو سره تمه ده افغانستان نه یوازې د ګازو له ترانزیټ څخه عواید ترلاسه کړي، بلکې زرګونو افغانانو ته مستقیم او غیرمستقیم کاري فرصتونه هم برابر شي. د افغانستان د کانونو او پټرولیم وزارت مخکې ویلي چې ټاپي به د هېواد لپاره د عاید، کارموندنې او اقتصادي زیربناوو په برخه کې مهمې ګټې ولري

په همدې حال کې، د ټاپي د افغان برخې د جوړولو چارې په داسې وخت کې روانې دي چې کابل او عشق‌آباد د پروژې د چټکولو، د افغان کارکوونکو د روزنې او د پاتې تخنیکي مسایلو د هواري لپاره د ګډو هڅو پر دوام ټینګار کوي