په هرات کې د طالبانو پراخې نیونې؛ شاوخوا ۲۲ ښځې نیول شوې دي

اشتراک گذاری:

سیمه‌ییزې سرچینې وايي، د طالبانو ځواکونو د پنجشنبې په ورځ د هرات ښار په جبرئیل سیمه او د صنعتي ښارګوټي د دروازې ترڅنګ یو شمېر ښځې نیولې او نامعلوم ځای ته یې انتقال کړې دي.

بریانیوز- جمعه ١٣ سنبله ١٤٠٥

د سرچینو په وینا، لومړی یو شمېر ښځې د طالبانو د «امر بالمعروف او نهی عن المنکر» ځواکونو له لوري د جبرئیل په سیمه کې ونیول شوې.

د نیول شویو ښځو کره شمېر معلوم نه دی، خو یوې سرچینې ویلي چې په جبرئیل سیمه کې شاوخوا ۱۲ ښځې نیول شوې دي.

سرچینې زیاتوي چې د دغو ښځو کورنۍ تر اوسه نه پوهېږي چې هغوی چېرته ساتل کېږي او د برخلیک په اړه یې هم معلومات نه لري.

په ورته وخت کې، دوو سرچینو بریانیوز ته ویلي چې طالبانو د هرات د صنعتي ښارګوټي د ننوتلو دروازې ته څېرمه لږ تر لږه ۱۰ ښځې هم نیولې دي.

د سرچینو په وینا، هغه ښځې چې په صنعتي ښارګوټي کې کار کوي، ډېری یې د بېوزلو کورنیو غړې دي او د کارګرانو په توګه د ښارګوټي په بېلابېلو برخو کې کار کوي.

په هرات کې د ښځو دغه نیونې په داسې حال کې کېږي چې طالبان په وروستیو میاشتو کې د ښځو پر جامو، تګ راتګ او ټولنیزو فعالیتونو محدودیتونه زیات کړي دي.

تر دې وړاندې هم د هرات ښار له بېلابېلو سیمو څخه د هغو ښځو د نیول کېدو ګڼ راپورونه خپاره شوي چې د طالبانو په وینا یې د دوی د خوښې وړ حجاب او جامې نه وې مراعات کړې.