اقتصاد

هالنډ مرکزي بانک : هالنډ له شمالي امریکا څخه ۸۶ ټنه سره زر لندن ته لېږدولي

اشتراک گذاری:

بریانیوز شنبه ( ۱۴/ سنبله /۱۴۰۵هـ.ش)

امستردام — د هالنډ مرکزي بانک وايي، د زیاتېدونکو جیوپولیټیکي کړکېچونو له امله یې د خپلو سرو زرو یوه برخه له امریکا او کاناډا څخه لندن ته انتقال کړې ده

د بانک د معلوماتو له مخې، د روان ۲۰۲۶ کال د مارچ او اګسټ ترمنځ شاوخوا ۸۶ ټنه سره زر له نیویارک او اوټاوا څخه د انګلستان د مرکزي بانک زېرمتونونو ته ولېږدول شول. د دې سرو زرو یوه برخه په فزیکي ډول انتقال شوې او ۵۹ ټنه په نیویارک کې پلورل شوي او ورته اندازه سره زر په لندن کې اخیستل شوي دي

د هالنډ مرکزي بانک وايي، دغه پرېکړه د بحراني حالاتو لپاره د چمتووالي او د سرو زرو د لا چټک لاسرسي لپاره شوې ده. د بانک په وینا، په لندن کې زېرمه شوي سره زر د نړیوالو بازارونو له معیارونو سره برابر دي او د اړتیا پر مهال تر نیویارک او اوټاوا ډېر ژر د پلور او کارونې وړ دي

د دې انتقال وروسته، د هالنډ د سرو زرو شاوخوا ۳۲.۱ سلنه په لندن کې، ۳۰.۸ سلنه په هالنډ او ۱۸.۵ سلنه په نیویارک او همدومره په اوټاوا کې ساتل کېږي. د هالنډ ټول د سرو زرو زېرمه شاوخوا ۶۱۲.۴ ټنه ده

د هالنډ مرکزي بانک ټینګار کوي چې له امریکا او کاناډا سره یې اړیکې خرابې شوې نه دي؛ خو د نړۍ د زیاتېدونکو سیاسي او جیوپولیټیکي بې‌ثباتیو له امله غواړي خپلې زیرمې په بېلابېلو ځایونو کې ووېشي او په احتمالي بحراني حالت کې ورته چټک لاسرسی ولري