د قرغزستان ولسمشر: افغانستان د آسیا د امنیت او همکارۍ مهمه برخه ده

د قرغزستان ولسمشر د اذربایجان په پلازمېنه باکو کې د «اسیا کې د تعامل او باور جوړونې اقداماتو» (سیکا) سازمان د مشرانو په اوومه غونډه کې ټینګار کړی، چې افغانستان د آسیا د ګډ امنیت او سیمه‌ییزې همکارۍ یوه مهمه برخه ده او په دغه هېواد کې تلپاتې ثبات یوازې د خبرو اترو او نړیوالو ګډو هڅو له لارې ترلاسه کېدای شي.

بریانیوز- جمعه، ٢٤ میزان ١٤٠٥

د قرغزستان ولسمشر د سیمه‌ییزو تحولاتو او ننګونو په اړه د خپلو څرګندونو پر مهال د اسیايي هېوادونو ترمنځ د پیوستون او همکارۍ پر پیاوړتیا ټینګار وکړ.

نوموړي د افغانستان موضوع ته په اشارې ویلي، چې دغه هېواد د آسیا د ګډ امنیتي چاپېریال او همکارۍ یوه نه بېلېدونکې برخه ده.

هغه د افغانستان د منزوي کولو او پر دغه هېواد د فشار راوړلو له تګلارې سره مخالفت څرګند کړی او ویلي یې دي، چې په افغانستان کې د تلپاتې سولې او ثبات لپاره رغنده خبرو اترو ته دوام، د اقتصادي بیارغونې هڅې او د نړیوالې ټولنې نږدې همغږي اړینه ده.

د سیکا سازمان د مشرانو په دې غونډه کې، چې د اسیايي هېوادونو لوړپوړو چارواکو ګډون پکې درلود، د اقتصادي او سوداګریزو اړیکو د پراختیا، ترانسپورټ، ډیجیټلي ټکنالوژۍ او سیمه‌ییزو پروژو د ملاتړ په اړه هم خبرې وشوې.

سیکا سازمان ۲۸ غړي هېوادونه لري، چې د اسیا د خاورې او نفوس شاوخوا ۹۰ سلنه تر پوښښ لاندې راولي.

افغانستان له ۱۹۹۹ کال راهیسې د دغه سیمه‌ییز سازمان غړیتوب لري؛ خو د طالبانو له هڅو سره سره، چې په دې غونډه کې د ګډون غوښتنه یې لرله، د سیکا د مشرانو اوومه غونډه د پنجشنبې په ورځ د اذربایجان په پلازمېنه باکو کې د طالبانو د استازي له ګډون پرته ترسره شوه.