صحّت

د روغتیا وزارت : کابل کې ۶۵ خصوصي روغتونونه له هېڅ روغتیايي معیار سره برابر نه دي

اشتراک گذاری:

(بریانیو چهارشنبه (۲۹/ میزان /۱۴۰۵هـ.ش

د افغانستان د روغتیا وزارت د کابل ښار د ۱۱۵ خصوصي روغتونونو د ارزونې پایلې اعلان کړې چې له مخې یې یوازې دوه روغتونونه د لومړۍ درجې معیارونه پوره کړي، نهه د دویمې او ۳۹ نور د درېیمې درجې په کتار کې راغلي دي

د ارزونې له مخې، له ټولو ارزول شویو روغتونونو څخه ۶۵ روغتونونه د روغتیايي معیارونو په پوره کولو کې پاتې راغلي او د درجه‌بندۍ په هېڅ کچه کې نه دي شامل شوي

د دغو شمېرو له مخې، د کابل د خصوصي روغتونونو د کیفیت او روغتیايي خدمتونو د معیارونو په اړه جدي پوښتنې راپورته کېږي. په ځانګړې توګه، د هغو روغتونونو وضعیت د اندېښنې وړ دی چې د ارزونې پر مهال یې د درجه‌بندۍ لپاره اړین معیارونه نه دي پوره کړي

د روغتیايي خدمتونو د کیفیت ارزونه د ناروغانو د خوندیتوب، د درملنې د معیارونو د لوړولو او د روغتونونو د فعالیتونو د څارنې لپاره مهمه ده

خو د وزارت له لوري د دغو روغتونونو په اړه د راتلونکو اقداماتو، د نیمګړتیاوو د اصلاح لپاره د ضرب‌الاجل او احتمالي بندیزونو جزئیات په ورکړل شویو معلوماتو کې نه دي روښانه شوي