د روسیې د بهرنیو چارو وزیر: افغانستان د سیمې د امنیتي اندېښنو په محور بدل شوی

اشتراک گذاری:

د روسیې د بهرنیو چارو وزیر سرګي لاوروف وايي، په منځنۍ اسیا کې امنیتي ګواښونه او په افغانستان کې روان بدلونونه د ډله‌ییز امنیت تړون سازمان (CSTO) لپاره تر ټولو مهمې اندېښنې دي.

بریا نیوز( سه‌شنبه، ١٤ دلو ١٤٠٤)

لاوروف دا څرګندونې د دوشنبې په ورځ په مسکو کې د ډله‌ییز امنیت تړون سازمان له عمومي منشي تالات بک مسادیکوف سره د لیدنې پر مهال وکړې.

هغه وویل، چې نوې امنیتي ننګونې او ګواښونه، په ځانګړي ډول هغه وضعیت چې دا مهال په مرکزي اسیا او افغانستان کې روان دی، د دغه سازمان د اجنډا په سر کې ځای لري.

د لاوروف په وینا، د سیمې بې‌ثباتي، سرحدي ناامنۍ او د ترهګرۍ احتمالي ګواښونه هغه مسایل دي چې د CSTO غړي هېوادونه یې جدي څاري.

د ډله‌ییز امنیت تړون سازمان یوه سیمه‌ییزه پوځي ټلواله ده، چې روسیه، ارمنستان، بېلاروس، قزاقستان، قرغزستان او تاجکستان یې غړي دي. د دغه سازمان د تګلارو له مخې، پر هر غړي هېواد برید د ټولو غړو پر وړاندې برید بلل کېږي.

دا په داسې حال کې ده، چې د طالبانو له بیا واکمنېدو وروسته د افغانستان وضعیت لا هم د ګاونډیو هېوادونو او د سیمې لپاره یوه حساسه امنیتي موضوع ګڼل کېږي. په دې وروستیو کې د افغانستان او تاجکستان پر پوله امنیتي نښتې او کړکېچونه هم زیات شوي، چې د سیمې د هېوادونو اندېښنې یې لا پسې زیاتې کړې دي.